إن جا مجال الشعر وان جا مجاله=وصار الشعر في ساحة المجد خيّال
اسرج مهار الشعر وادعي رجاله=وارسل على فكري ثمانين مرسال
والفكر يسألني واجاوب سؤاله=ويصير بين اثنيننا شد وجدال
وبعد الجدال وبعد رسم المقاله=اطلق سراح الفكر في دنيا الامثال
وابحر مع اللي يلطم الموج جاله=اصارع الأمواج وارسي على الجال
واغوص واتحدى مخاطر اهواله=واطلّع المرجان من قلب الاهوال
وامشي مع الشاطي واعانق رماله=واطرّز الفيروز ويصير لي شال
وآخذ من الصحرى معاني السّهاله=واشوف فيها الموت كثبان ورمال
واذا بغيت العند هو والجهاله=اهبط مع الوديان وارقى مع جبال
واخذ احوال الناس حاله بحاله=ارسم مشاعرهم ومالي والازوال
اصوّر البسمات باقه لحاله=والحّن الأحزان وتصير موّال
وتتكامل ابياتي معاني وجزاله=وعادات شعري دايم ابياته اجزال
واليوم جا للشعر دور ورساله=يعبّر عن اللي ينهش القلب عمّال
ويا عزتي للقلب وا عزّتاله=النار شبّت داخله تشعل اشعال
ويا ما جرى للعين ياما جرى له=من دمع تالي الليل عالخد همّال
باسباب أمه ضيعت راس ماله=تاج المعزّه من على راسها مال
أمة محمد حالها ينرثاله=ضاعت كرامتها وتقديرها زال
بعد الحضاره والرخا والعداله=مع التخلف والجهل دربها طال
تمشي ورى صهيون تنقل نعاله=وكل يوم يلطمها على الخد بنعال
ومن أخّر اليمنى وقدّم شماله=يجيه حقه ناقص ويشرب حثال