لا صار لي بالدار ربع وعشيرة=عيّـنت منهم مستشار وشاير
أشاور أهل الرأي وأخذ جديره=والحر ياقع في طويل الجداير
المستفيد اللي يصفي ضميره=وهذي سوات محكمين الضماير
وان شفت لي بالدرب ركب مغيره=ما أرد علمي للفريق المغاير
لآمنها صارت أمور حقيره=خليتها لمدورين الحقاير
ولا شفت من شره يجي قبل خيره=صديت من يمه صدود المخاير
ولاني بصايد بالمياه العكيره=النبع صافي والعكاير عكاير
والعارفين عقولهم مستنيره=والليل ما يخفي ضوي المناير
والعود فوق النار يظهر عبيره=والفرق يفرق بين طيـّـب وباير
يا لأدمي لا تمشي أعمى بصيره=واللي يقدر خالق الكون صاير
الأفق واسع والمساحه جزيره=وجميع ما بالكون طرقي وزاير
لا تلمس الجمره تراها خطيره=رسالة جاتك بجنحان طاير
صالح مبارك المشعلي
المساحه جزيره
العرض العادي
