يا الله يا اللي تغفر لعبدك ذنوبه= أسالك الطف بحالي وأغفر ذنوبي
يا واسع المغفرة يا قابل التوبه=ممن عن ذنوبه وزلاته يتوبي
نخطي ولا ندري والأعمال محسوبه=جميع ما نعمل مسجل ومحسوبي
يا رب عبدك ما غيرك يستر عيوبه=لولاك تستر عيوبي بانت عيوبي
ومستقبلي مدعين العلم ما جوا به=وتعلمه وأبوي وأمي ما بعد جوبي
الأجل مكتوب والأرزاق مكتوبه=ما لي سوى اللي بعرض اللوح مكتوبي
لو كان رزقي بيدين الناس عيوا به=اللي ليا شانت الأحوال باروا بي
ولكن الله جعل كل وماجوبه=منه غناتي ومصروفي من جيوبي
ورفيقي اللي يصك الباب من صوبه= صك بابه وأصك الباب من صوبي
ويلقا من الناس من جنسه ومن ثوبه=لا نيب من ثوبه ولا هوب من ثوبي
ما دام لا احتاجني لبيت مطلوبه=واجيه وأروح ما حصلت مطلوبي
وشعاد بي به ما دام أن هذي أسلوبه=واللي معه وافقوه بنفس الأسلوبي
( لوبية ) يلوبهم بالخبث وتلوبه=لا بارك الله فيه وحزبه اللوبي
عن منهج الخير صد بهم وصدوا به=وصديت عنهم ولو ما أصد صدوا بي
أهل الردى لو يطول الوقت ما ابطوا به=و الطيب ما يكسبه طوب ولد طوبي
ما يكسبه غير من ربعه تعزوا به=اللي يوقف لهم في كل ماجوبي
والطيب له راية بيضاء منصوبه=راعيه ما هو على ذولاك مغصوبي
الشر بيّن وكل يعرف دروبه=والخير بيّن وله منهاج ودروبي
وبعض المحاذير عند الناس مرغوبه= من خلق الإنسان والممنوع مرغوبي
وعقول متحجره وعقول مسلوبه=ولا يفيد عقل عن التفكير مسلوبي
والعلم له ناس صالوا به وجالوا به=في عالم كل شي فيه مجلوبي
وكل من الوقت قلبه يضرب جنوبه=وأنا بعد قام قلبي يضرب جنوبي
أفقد صوابي لا شفت الناس مرعوبه=وأفز مثل اللي من الخوف مرعوبي
حنا بوقت به الأوضاع مقلوبه=والناس مفهومهم بالعكس مقلوبي
كلش تغير وعصر ( العولمة ) دوبه=يا دوبي أعرف دخول ( النت ) يا دوبي
عبدالله المشعلي