محاوره بين القحطاني والطرقي

[القحطاني]

سلامي على اللي تكسب الطيب يمناه=اقوله حقيقه والعلوم امحسوبه
انا شايف الطرقي يتبع مطاياه=يدور حلوبه ما لقاله حلوبه

[الطرقي]

هلا مرحبا باللي طروقه مخلاه= بعد مالبس له ثوب من غير ثوبه
عسى الله يوفقنا على مكسب رضاه=ونلقا المثوبه من اله المثوبه

[القحطاني]

يدوم البقاء ورجول خيلك محذاه=تجيب الحطب والاتجيب الجلوبه
ترى العاقل اللي لامشى يحسب خطاه=وعلى قد ماتخطي تجيك العقوبه

[الطرقي]

تروض تحت عين ابن غانم وشلفاه =ولاهوب مثلك يعشق اجواء الرطوبه
اشوفك مثل من لحًق الغرب مسحاه =بعد ما اقترفت الذنب سويت توبه

[القحطاني]

ليا زان خطك يا عميلي قريناه= ولاشان خطك في القرايه صعوبه
لقينا رفيقك بين ضانه ومعزاه=يزمر ومزماره يزيده عذوبه

[الطرقي]

الا يا عميلي من زرع زرع يجناه=ولك في الثمر غرسه وفي البذر روبه
مدامه بمزماره ويرعى رعاياه=ويش اللي حدابك يابن الاجواد صوبه

[القحطاني]

من سنين والطرقي كثيره نواياه= ولا ادري متى الطرقي تلاقا دروبه
ولاشفت للطرقي قصايد معاناه=كن الوضع عادي والبلا في جنوبه

[الطرقي]

من سنين والطرقي راعى الوجه والجاه=على كل مذهب للعرب والعروبه
ويا ابو قحط لو لك قصايد مغناه=يجوز لك تنقد من رسب في رسوبه

[القحطاني]

ابن عم ذيك ام الكفوف المحناه=عطاها نهار العيد دبلة خطوبه
وانا اقول ذا عصر الغناء والملا لاه=تلاعب مع الدنيا تراها لعوبه

[الطرقي]

انا مادريت انه انت شوق المخباه= ويادوب عرفك بان يادوب دوبه
ومن لاعب الدنيا بتبحث خفاياه=ولا عاد ينفعه الندم من ذنوبه