مستمعينا الأفاضل السلام عليكم ورحمة الله وبركاته مع برنامج ياما تحت السواهي دواهي وفي هذا البرنامج نستضيف العضو الذي عاد للتو بعد التمتع باجازة سنوية في ربوع القهاوي في مختلف ارجاء الدول الخليجية ولم ينس ان يختمها في مقهى يقولون ان اسمه الفرسان في شرق الرياض
ضيفنا ياخوان وياسحالي هو احد المنسمين الذي أدهشنا بذكائه المفرط ومالديه من الحكم ومن حكمه الشهيرة عين الحسود فيها مرواس وقال ايضا مالك الا شعرك لو كنت أقرع
في البداية نحب تعطينا نبذة عن حياتك
كابتن ماجد: اسمي كابتن ماجد بن فنيغش العمر / 20 سنه و 5 سنين الهوايه / طيار مدرس تاريخ
المؤهلات / حاصل على المتوسطه من جامعة أكسفورد بكلية المعلمين بجيزان .
متزوج وعندي بزارين ولدين وبنت وولد وضب حديث الولادة
وكلهم اسميتهم محمد ماعدا خالد أسمه فيصل على اسم ابوي نورة
حاليا أسكن في امبراطورية الظهران العظمى واحفظ بيت للشاعر مدحت مناحي وقد أخبرت الشاعر اني اعرض بيته في مكتب عقاري لكنه عيا وذنبه على جنبه
كونان: اخ كابتن ماجد يقال انك واجهت صعوبات خلال حياتك وايام كنت في سوق الأسهم فهل لك ان تحدثنا؟
كابتن ماجد: في الحقيقة لم اكن ولم أفكر وماجا في بالي اصلا اني أنا اكون سبب دمار سوق الأسهم
كونان: كيف؟؟؟
كابتن ماجد: لأني لما اعتزلت من سوق الأسهم درعمت نزولا مثل جيب مغرز فوق طعس في البحر وماتوقعت اني مؤثر بسوق الأسهم خاصة ان كان في محفظتي حوالي 10 ريال شريت بها سهم في المكيرش وشكلي برجع لسوق الأسهم من أجل ان اطلع المؤشر فوق
كونان: طيب كابتن ماجد هل تعتقد ان احد الأعضاء شخصيه سيكوباتيه ام لا ولماذا؟؟؟؟
كابتن ماجد: ماهو شعورك لما تطرح على سؤال مثل ذا ؟؟ تراني اقدر اجيب سؤال أقسمك فيه
اما بخصوص الجواب نعم أنا اعترض على قيادة المخفات للسيارات
كونان: خلك معي اقولك سيكوباتبيه
كابتن ماجد: ياخي انت تلعب علي السيكوباتيه نوع من الساعات وتلقى دعاياتها في مباريات الفيفا ولو تابعت مباراة فرنسا والبرازيل على أرض ملعب جيزان الدولي لشفت الدعايات ولا دعايات موبايلي
كونان: طيب ننقز اي نطمر السؤال ونروح لسؤال ثاني
أخ كابتن ماجد ماتعريفك للعولمة ؟؟
كابتن ماجد: العولمة ياخي اسمع بها الشي العولمة اممممممممممم مو العولمة تصغير عملة
كونان: ما أهداف حياتك؟؟؟
كابتن ماجد: اهدافي كثيرة أذكر منها لما كنت كابتن منتخب ايرلنده سجلت على الدعيع هدف ولا أروع حيث ان الكورة عدت العارضة وضربت الكاميرا وطار رجل الكاميرا معها فرجعت لرجلي وكملتها في الباب بحركة كابتن ماجد الشهيرة تسديدة طرقع الصاروخية وتدري ان اللي جابها قبل كان يوسف الثنيان وعدة مرات ورونالدينهو لما سوى مثله شحت الكورة برى
كونان: اذا فرضنا انك انت الحارس ودخل عليك الجمعان هدف وش يكون شعورك؟؟؟
كابتن ماجد: ياخوي لاتذكرني بذيك المباراة الجمعان الله يستر عليه بس أعجبك قطعت الكورة بالشوكة والسكين
كونان: حدثنا عن طلعاتك للبر
كابتن ماجد: طلعاتي عادية فيه اختراع اسمه سلف دقه ورح دايركت
كونان: ما رأيك من يقول انه بيروح الديرة وتلقى اسمه مكتوب في العربية وهو رايح امريكا وتلقى تحت فلان أسير مظلوم؟؟
كابتن ماجد: ما اقول الا احسن ليش ماقالي اروح وياه؟؟؟؟
كونان: احسن مكان زرته؟
كابتن ماجد: احسن مكان اسمه وش اسمه؟؟؟؟ مدري بس أذكر ان فيه زحليقة الدورة ب3ريال عزوز يعرفه
كونان: وأحلى مكان تعشيت او تغديت فيه؟؟
كابتن ماجد : احلى مطعم كان في ايسلنده مدري نيوزلانده مطعم يعجبك اسمه مطعم الجمل وجنبه ماكدونالدز على الطريق اللي يودي للرياض وبعد ما انسى مطعم زحلة في ماليزيا اللي قعدت فيه سنين من الذكريات
كونان: ما رأيك بالمسرح المنزلي سمعت ان عندك واحد
كابتن ماجد: افا عليك ماعندي الا عندي ونص وفي كل غرف البيت بس مليت انتظرتهم سنين بس ما بدت شكل المخرج فطس
كونان: طيب جملة اخيرة قبل نختم اللقاء
كابتن ماجد: ايه عندي جملة اسمية وفعلية وعندي بعد شبه جملة
كونان: ولا يسعني في هذا اللقاء سوى اني اشكر المخرج والمعد والمنتج والضيف كابتن ماجد على هذا اللقاء ونشوفك مرة ثانية
كابتن ماجد: اقول تراني بتعشى عندك الليلة
كونان: اقطع واخس
المهم بس اكمل هالجملة وانقلع
في نهاية هذا اللقاء يسرني ان اشكر جميع المشاهدين وعظم الله أجركم في مشاهدة مالاينفع على ما قدمه في هذا اللقاء
لقاء مع كابتن ماجد لقاء غير عادي منقول فضائيا عبر الحمام الزاجل
العرض العادي
