حب في قلبي تسيس بمقصوره وبيت=واستلم مفتاحها من ملكني حبها
وحدةٍ حبيتها حب من قلب ووفيت=حبها حتى معاليق قلبي جبها
ايه اموت بحبها جهر والله ماستحيت=ولا يريح خاطري غير يوم آحبها
يوم اعانقها بعد غيبتي لامن لفيت=كني اللي به جروحٍ وحصل طبها
انتعش وافيق واصحي ولامني صحيت=اتخدر في حنان القلوب ولبها
واكتسي باعظم خشوع ومذله وان حكيت=كني اللي كلمته يستحي ينّدبها
ادري اني قرم واني على العليا سميت=وان عزوم الراس ماحدٍ بطاحن حبها
واني أقسى من حصاة اقحطان ومن حفيت=بس تو امي جميع الخصال اذبها
في لقاها افرح ولاجيت باسافر بكيت=وخفي الدمعه على طول لاتذّهبها
امي امي يابعد كل حي وكل ميت=في رضاك النفس نذرٍ علي ما احسبها
والله اني لك مدانٍ بفضلك ماحييت=كلمةٍ ما قلتها كذب ولا أنصبها
وادري اني ما أقدر اجزيك شي مهما سعيت=بس أحاول أرضي النفس وأرضي ربها
يا إلاهي يا مجيب الدعا وانا دعيت=تقبل الدعوه يارب العباد ولبها
تحفظ امي حفظ من كل سوء اولا نسيت=امهات الناس دعوه اليك أقربها