يامل قلب تلاعبه تفاكيره = تلاعبه لعبة الجهال بالكوره
حراس همه عليه تولع النيره = وأحد على مدخله واحد على سوره
يحرم عليه الفرح تضحك مزاميره = ويسمح دخول النكد لاصف طابوره
على وليف جفى حبه وتقديره = قفى ولاله معي صوت ولاصوره
سمع كلام العواذل واخلفو سيره = وأذنه على سمعهم ماهي بمجبوره
مايدري إن الحسد والشك والغيره = أكبر سبب للفراق وساس دستوره
وانا موصيه فالحب ومعاييره = وقلت له راع الحسد لاتستمع شوره
وقلت له جنب بعد عن شره وخيره = تراه مايذخر الا كرهه وجوره
وطاعه وخلاني انعى الهم والحيره = وأبكا عيون قديم الوقت مسروره
واليوم يرسل مع الساعي معاذيره = بعد جفوه العواذل وانطفى نوره
ويقول تكفى ترى للأثم تكفيره = والنفس في يدك منهيه وماموره
مايدري إنه سكن وسط الحشا غيره = ولايدري انه انتهى بعد الجفا دوره
دام البدايه كذا بكبها سيره = ولاعاد ابي له معي صوت ولاصوره
قفى ولاله معي صوت ولاصوره
العرض العادي
