ســـوق الأصحــآب ...!!

[شــــامــــخ]

الطيب شمعه والذكر عود كبريت ..
.. والعز نــوره معتلي كل مرقاب
..
والعهد ضيفٍ والوفا راعي البيت ..
.. وللعدل ميزانٍ وللنار شباب
..
وأنا بذلت الجهد وأتعبت وأفنيت ..
.. روحٍ جسدها ساسها طين وتراب
..
أوفيت في كسب الجمايل وكفيت ..
.. مآهو لآجل سمعة منافق وكذاب
..
طيبي طبيعه ماعلى الطبع عديت ..
.. مثل النهر يسقي ولآ يطلب حسآب
..
أزريت أعدل في خطآك وتماديت ..
.. لآبارت الصحبه هبط سوق الأصحاب
..
كم مرةٍ بأقصى مدى الصوت ناديت ..
.. أواه من دمعٍ فضح سـود الأهداب
..
خاطرت بالدنيـــا وتهت وتعنيت ..
.. وأصبحت من كثر المتاهات مرتاب
..
ومن الوفا والطيب والجود مليت ..
.. وأنا الذي للمرجله دوم كساب
..
ضحيت في بذل المعاريف وأوفيت ..
.. ومن دونهم ما يوم صكيت الأبواب
..
دام الوفا بعيونهم بخص ومقيت ..
..و أنا الوفا بعيوني سنين ما غاب
..
ومهما ضحكت من الغبن ما تناسيت ..
.. اللحظه اللي جرحها ما بعد طاب
..
ياليتني فيما مضى ما تهقويت ..
.. في ناسٍ تثير الفتن بين الأحزاب
..
وياليتني في دار الأحلام ماجيت ..
.. كان أسترحت وعارضي مابعد شاب
..
وياليتني في خلوتي ما تمنيت ..
.. قربه ولاشوفه ولا طيب الأنساب
..
وإن كان تجهل موقفي فيني أخطيت ..
.. وأصل الخطأ من موقفك ماله أسباب
..
وأنا ترى من زلتك فيـك عزيت ..
.. نفسي وذاكرتي من هموم وإعجاب
..
بكره مع مرور الزمن قول [ يا ليت ] ..
.. ما تنفعك عقب المعزه والأحباب
..