قصيدة راشد بن حسن العجمي (خر الذيب) ورد بن مسعود بن عنبر الدوسري

[الكاسر]

بسم الله الرحمن الرحيم

الحمدلله والصلاة والسلام على رسول الله وعلى آله وصحبه أجمعين




الشاعر راشد بن حسن العجمي الملقب ( بخر الذيب ) كان يشتغل سوّاق في ارامكو وكانت انظمة ارامكو تمنع السائقين ان يشيلو الطرقيه اللي يوقفون السواقين ويطلبونهم توصيلهم على طريقهم .. والشاعر راشد الله يرحمه كان يخالف التعليمات وكل هذا حيا فيه ومرجله يوم من الايام أشرت له عجوز ومعها غنم قالت وصلني يا الأجودي قدام شوي قال ابشيلك بس الغنم .لا قالت له خلاص روح الله يستر عليك بيجي خر الذيب ويشيلني انشاْ الله تقصد راشد العجمي .. قال لها يا خاله انا راشد الذيب .. اركبي وابشري بالخير .. وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث رحمه الله .. وله في ذلك ابيات جميلة منها :

قالها إبن الذيب من هاجوس باله=كلمةٍ يلعب بهـا والبـال زينـي
قالها يومه طرالـه مـا طرالـه=من هواجيسٍ تشيب المرضعينـي
غرّني بعض الرجال بكثر مالـه=مادرى إن الموت في حبل الوتيني
كيف ينفعني وبعض الناس خاله=ما يدوم البيت كان الساس طينـي
ماش وين اللي عوايـده الشكالـه=مثل إبن ظافر حمد ليته يجينـي
الثنا والجـود دايـم فـي خيالـه=علّمـه ظافـر سلـوم الطيّبينـي
جـوّد العليـا ولزّمهـا عيالـه=وأدركوا من علمته دنيـا ودينـي
واهني من باع حظّـه وإشترالـه=سار في درب النبي وأخزا اللعيني
موقفـه ماكـل رجّـالٍ ينـالـه=ومن بغا ممشاه يقعـد مرّتينـي
وكم ذبح من حايلٍ من حر مالـه=وعادته لطمة خشـوم لعايلينـي
حالفٍ ماخذ على الطرقي ريالـه=وبالثلاث محرّم إنها مـا تجينـي
لا لقيت اللي على السكّـه لحالـه=يلتفت ويقول : وين المستحينـي
أوقف الموتر حيا وأبغا الجمالـه=يوم ولد اللاش وجهه مـا يلينـي
والطمع في كرّوة الرجلي رذالـه=خصّ به وإن جا مجال الغانميني
والردي في حالةٍ ماهيـب حالـه=يا عوينه مـن كـلام الطيّبينـي
الولد وإن طاب قالوا : من خواله=بالخوال يسـال قبـل الوالدينـي
وأركبه لعيون من زيـنٍ دلالـه=ما تحاكوا في قفـاه الرامسينـي
ما بغى غيري وأنا مابغا بدالـه=قاعدٍ لي بالرجـا مـدّة سنينـي
ما قعدنا فالعمـل نبغـا الرزالـه=ناخذ العليـا طريـق الفايزينـي
وأشرب الفنجال وأكـب البيالـه=تابـعٍ سلمـي سلـوم الأولينـي

ورد عليه الشاعر الكبير : مسعود بن عنبر الدوسري حيث كان مسعود في احد الأيام يبي يركب مع أهل السيارت المتجهين للرياض ومر عليه شخص معه سياره ومعه ركاب فسأله مسعود ان يركب معهم فقال السواق مالك درب معنا ثم نزل السواق في ظل شجره ونزل برّاد الشاهي وصب لنفسه وترك أخوياه الركاب ما قهواهم معه. بعدها بلحظات مر على مسعود رجل من أهل الهدار بالأفلاج يقال له ابن حسين من قبيلة زعب ، ووقف ابن حسين لمسعود ثم انزل واحد من ابنائه- كان راكب معه في الغماره- واركبه في الحوض وحلف ان يركب مسعود مكانه ، ولم يكتفي بهذا فقط بل إنه أوقف سيارته ونزل معاميله وزين القهوة وقهوى مسعود والركاب اللي معه وذبح لهم ذبيحة ، وأوصلهم بالمجان ( وكان هذا الكرم من طبعه ) فقال مسعود قصيده طويلة في مدح ابن حسين وذم ذلك الرجل البخيل ، يقول مسعود في قصيدة طويلة لا أحفظ منها إلا أبيات قليلة :

راكب اللي لا مشى تومي حباله=لا نوى له ديرة (ن) جاها بحيني
انص خر الذيب عندي له رساله=عـندنا مثله ربوع (ن) طيبيني
عندنا ابن حسين يفعل ما طرى له=يركب الطرقي وهيف(ن) له سميني
كم نقل له خبرة (ن) من حرّ ماله=لا لقاهم في الخـلا متعـطـلـيني
ضَـوّهم ضوّه ودلتهم ادلاله =شوف عيني واشهدوا يا حاضريني
جعل يفداه الردي راعي البياله =شارب الشاهي وربعه قاعديني

وسلامتكم