السلام عليكم ورحمة الله وبركاته
وبعد ..
اقدم لقلوبكم الطاهره هذه النصوص المتواضعه التي اتمنى
ان تحوز على رضاكم لعلها تخلق لي عذر من عتبكم بعد هذا الغياب
بسم الله نبداء
(مدخل)
قاعد مع الصبح الرهيف اتفرّج=على عصافير الصباح السعيده
والعين بنتٍ طاهره ما تبرّج =الا اذا لبست حروف القصيده
(نصفي الثاني
من بين اصابيع صوتي جمّر لسانـي=واشعل بتبغ الكلام وقمت بـحروفي
اطفي الكبت من سيجـارة احزانـي=وأدخن الصمت صبر ويحتـرق جوفـي
وآكن قلبي من همومه بـ شرياني=لين انفثه فـ الورق من راحة كفوفـي
واكح في صدري من الوقت مآعاني=آخاف لا آعدي الهوى من زفرة نجوفي
وأغسّل انفاسي من الهم لا اشقاني=وأنشّف بـ ضحكتي ما عبّسه أوفي
وانشر على سياع وجهي نصفي الثاني=اللي تركته لـ بوي فـ بيتنا التوفي
لـ مرحبا وارحبوا بـ سلوم جداني =لـ للفرحه اللي تسابقني على ضيوفي
لـ معاندي صبة الدله مع اخواني =لـ صغيّر القوم شفرتهم من حلوفي
للمدخن اللي اسوقه وسط شيباني =للشايب اللي بـ فعل الطيب مخلوفي
والليله امسيت وسط الليل وحداني =ما غير انا والتعب والهم وصروفي
إي والله أن السهر فحّم علـى اجفانـي=والليل عودٍ مجمّر فـي طـرف شوفـي
يا اياني اياك تكفى بس وأياني=تزعل الا شفتني مرمي على خوفي
لو وسع صدر الزمان بـ وسع وجداني=ماضاق مجلس وسيع الصدر بـ ضيوفـي
ازرع نخيل الوفا في تربة احسانـي=وتموت بـارض الجحود عذوق معروفي
وآديّن النـاس مـن بقالـة اشجانـي=وآنا آتسلّف فرحهم مـن ورى ظروفـي
وأشره علي قبل لا أتشرّه على اخداني=وآخذ وفـاي بيـده وقـول لـصروفـي
الريح حاجة ولو ماهـزت اغصانـي=ما اشتد عرقـي ولا طوّلـت بـوقوفـي
ياصاحبي الليل لف عيـون عدوانـي=لا شفتني في طريق الحـزن مرصوفـي
لو ما بركت وحملت الوقت بـامتاني=ما عنّز طويق ضلعينـه علـى اكتوفـي
العمر ملهى وجو الطيش اغواني =حتى غفى هـ الصبا مع حلمه الموفي
تعبـت ادوّر لـشـيٍ فـي تعدانـي=كنه العمر والبياض اللي علـى زلوفـي
وأمشي مع نفسي العرجـا ويحدانـي=عمرٍ عصـاه السنيـن الغبـر وحتوفـي
وانا رسالة زمـن والقبـر عنوانـي=ريدهـا اللحـد والتابـوت مظـروفـي
فـ لو ما احتسب للظروف بقوّة ايماني=ما خذني الفجر للمسجـد مـن كفوفـي
ياصاحبي الليل قوم أتشّكّـر أزمانـي=عني من اربع ظـروفٍ فتّحـت شوفـي
العسر والضيق والحجات واحزانـي=خلتني اعرف اصحابـي مـن ظروفـي
(فاصل عاطفي)
جوعتك ومت وطاحت النفس هزعه=وأنته تجوعني عشان اطلبك قوت
لاهنت لكن نفسي ان شمت جزعه =لو كان ما تسمع لا أحاسيسها صوت
مادامك مقفي ابي منك فزعه =عطني قبل لاتروح بالله تابوت
عشان لاحسيت بالروح نزعه =ما افكر بغيبتك وشلون بآموت
(كذب الصبر مفتاح الفرج)
الصدر مجلس كبت ومعزبه في صـوتٍي خـرج=ياخذ نفس للضيف لكـن ماقدر يكرمه شـي
وعوّد مع حنجـــرتي اللي كنّهــا عتــبـت درج=يجر ريقِ اللي قصر عن موقفٍ ماهو بـ لي
والصمت بـ لسان المتاعب يامصبّرنـي هـرج=في سدرة احزان الكلام اللي ربت بالجرح فـي
عز الله ان بن المواجع ما علـى مثلـه حـرج=لو راح يشحذ من يدين الشمس للمحتـاج فـي
شوف التعب في عيني اليمنى من افعالك سـرج=مهره كأنها تسكب من النـار للعطشـان مـي
ياساكنين فـ بطن الارض الموت؟في مشيه عرج=انا اشوفه في يد الحاجـه ليـا صكـت علـي
سبّبّت لي بـأعذارك الهزله مع نفـس حـرج=وخليتني اموت في عيني وانـا لا زلـت حـي
عزالله أن صبري معك ماهو بـمفتـاج الفـرج=هذا انا صابر عليـك ولا فزعـت بـأيّ شـي
(فاصل غزلي)
عينً كأنها بالحور منرسمه =بأنعاسة اللي من منامه فايق
الترفه اللي بالكرز متسمه =دلوعة فيها التغنج لايق
لانست بصبح ندي النسمه =تروق اللي مابعده برايق
ولافلت بوجه الحزين البسمه=كنها توسع خاطر اللي ضايق
(حياتنا فوضوية)
حياتنا فوضوية شعب مدّيها=من خمرة الغيبه اللي كاسها ربوعي
والغبن حله وقل العز واطيها=لو أبني أسقوفها الهزع من ضلوعي
أشعلت عودان عيني لجل أضويها =ولامات عود الهدب الا من دموعي
فالنور لويستر الحله وآهليها=ماشفتني من هناك أطفي شموعي
صعبه اصادق جميع الناس وارضيها =دام الرضا ابعد علي من حبة الكوعي
استنفذتني الآوادم كثر ما اعطيها =وما باالاوادم رجل يمشي على طوعي
وانا كذا بين هبّلها وصاحيها =عجزت افرّق ما بين الكم والنوعي
و اخلاقنا كنها مرايه لراعيها=أن زان طبعك معي ماشانت طبوعي
والطيب لحية وفا لاهب جاويها=شفته مع بيض الله وجهك يفوعي
بالمختصر ياصديقي هاك تاليها=اللي على طوفة الازمان مطبوعي
من كثر ما آحباي إيامي وأمشيها=عجزت لا آمشي ب هالديره أسبوعي
لوكل من هو حفر حفره وقع فيها=ماراح تلقى بديرتنا ولا دوعي
(فاصل ثلاثي الابعاد9
الشيخ من مدته والرجل من علمه =والدار تعرف ليا كثرت مفاجعها
والناس لأتباعها وكلٍ على سلمه=واهل الفتاوي تمذهب من مراجعها
والرجل وقت الغضب إيبان من حلمه= والحلم يظهر زعيم الناس واشجعها
الفرصه الضايعه والعمر والكلمه =ثلاث اشياء ما تقدر ترجعها
(ابو الدشداشه النيلي)
تمذرا ياحمام بريشتك ميلي=وزبّنته جناحينك وبأحساسك
هديلٍ لو تبغددبه مواويلي=حطب كل الحروف وشب قرطاسك
وأميجن لك اصابيعي وتشجيلي=عصافير القصيد بروض كراسك
وهذا دفتري حبري مراسيلي=تخمر بتوتك وتثمل بنعّأسك
على الهودل ياابو الدشداشه النيلي=تلثم واستعذ من ملح خناسك
قهرت النور من ضيّك وقنديلي=جزم قلبه على خدك ولا باسك
وتعنك نسنسة سمرة تعاليلي=وازعفرها تدلعانك واحساسك
وهذي دلتي تمري فناجيلي=تبي تقدع يديك وتشرب انفاسك
واصبرها على جمرك وانا حيلي =برد من تحت فيروزك والماسك
وليلك معتم وغرّتك تضويلي =خجل تدنيقتك من تحت نبراسك
والاقيك بـ تفاصيلي تفاصيلي=واضيّعني على قدك ومياسك
حبيبي اص توّه ما شعر ليلي=بـ عسعسة الشعور اللي من انفاسك
ولا تسولف عن احساسك وتحكيلي=ما دام عيونك تسولف عن احساسك
(فاصل عاطفي)
صدري ضما والأرض حزن تناهيت =وخد الطريق من اللواهيب عطشان
وانـا ليا شفتك مقبّل عـلى البيت =ولمت عيني للمفارق والاحزان
وغمضت من حزني كذا كل ماجيت =وأنته تحراني من الشوق فرحان
وانا مغمضها علشان لا أقفيت =ما يطيح لأفراقك من العين انسـان
(محاولة تعريف التفرّد)
من التفرد انك تفكر بعكس الناس زي =شخص يجد نفسه بعمق اشياءه المتعقده
ياللي من اللاشي سويت بجنون العقل شي =ابطيت نايم من تحت جمرٍ خشع في منقده
شب في عسام الفكر من روحك لهذا الوقت ضي=وكون بزمانك للجهل نارٍ من الله موقده
وتفي من شمسك بذاتك واجعل من الشمس في =واقراك من داخلك لكن حاول انك تنقده
واستنطق يدينك عشان تصح صح لعمرك شوي =من نومة لسانٍ توسده السكوت بـ مرقده
ولاتعقد احجاجك وتذبحك المواجع وانت حي =ما يحل حبل الضيق في صدرك سوى من يعقده
وعشان تبقى شي لا تملك لعمرك اي شي =كن ذلك اللي ما ملك شيٍ لعمره وفقده
(فاصل جكمه )
عمري خرز مسباح والوقت يفركـه=وسنينـي اصابـع والأيـام تبـراه
فـ صب الأمل في كاسة الحلم وأحركه=وتقهـو باقـي العمـر للـي فقدنـاه
مـا كـل ماحنّـا نتمنـاه نـدركـه=وماكـل مـا ندركـه حنّـا نتمنـاه
(عيش الحياة بسعاده)
فج الرضا بابه علينا وصكت=قلوب ناسٍ ما تعرف العباده
ابواب خيرات من الخلق لكت=بذنوب عبّاد البشر والسياده
ياخي لو أنّ الارض هذا تكشت=ايقنت بأنك ما تساوي جراده
يعني لو أن امواتها لها تحكت=عرفت بأن مابه على الناس ساده
الا الله اللي من على يديه فكت=ابواب خير قفلوها عباده
فـ أحد على فقره ليا ضاق نكت=واحدٍ يعيش من الغنا في نكاده
ناسٍ يالو انها على الناس زكت=ماشفت في فم السحايب سداده
مات سنابلنا والايام دكت =زرعً حصدنا قبل نجني حصاه
يارب وأغني اللي سنينه تركت=عبدٍ تورّعه من الناس زاده
اللي عيون بأعظم اسماك بكت=حراس ابواب السما من زهاده
شفني كثر ماحاجة الوكت حكت=جني على شوك الزمان وكداده
الا أن كفيني على الجمر ضكت=ولا سقتها لـ صاحب سمو وسعاده
اشرب غثا الايام كل ما ستعكت=واحسه من الصبر سكر زياده
رغم أن الاحزان بضلوعي توكت=الا أني اعيش الحياة بسعاده
بتقول كيف اسعد بها لا اصتصكت=بقول لك وشلون هذي السعاده
اليا استضاقت الارض فيني ولكت=وسعت صدري بالدعاء والعباده
(فاصل لأماني)
ماتشبهين الا صباحٍ ونساس =هــذا يبــي هـــذا وهذا اناني
ميت على كفك من العقد الماس=وشلون من هو مات بك يا أماني
فالموت ماهو موت قلبٍ بلا احساس=ولاهو بموت الحلم خلف الاماني
الموت لامن صرت تعشق من الناس =انسان ميّت له على أنسان ثاني
(مخرج)
كل ما شعلت الشعر بيدي غليون=مزّه حزينٍ من بلاده مشرّد
ف ماصرت بعيون المخاليق مجنون= الا لأني خارج السرب أغرّد
وخلاص تعبت لكن القادم اجمل
تحياتي القلبيه
محبكم ومغليك
(((13في 1)))
العرض العادي
