القدر بالصدر
الأ يا الصديق الصادق الواصل القطاع=ما دام القدر بالصدر خل الوصل مقطوع
بنيت الصداقه مثل بيت ثلاث إرباع=وحطيت لك نتقه مثل نتقة الجربوع
لجل حاجة لا هيب تشرى ولا تنباع=تبيها أول الأسبوع والا آخر الأسبوع
ليه تخالف المرباع يا مدور المرباع=وأنا أمدّ لك على الوفا البت والمربوع
على كل حال يمد باعه طويل الباع=ومهما حصل ما يتبع التابع المتبوع
مجالك مع الآفاق بين السماء والقاع=ولا طايرات الا وتصبح وهن وقوع
تضيق الصدور وتتسع والدروب وساع=لا شك الملام أقرب من الكوع للكرسوع
ما عاد أتحمل منك ضيقة صدر وأوجاع=ودرب الخطر فيه التعب والضما والجوع
ولا لي معه روحه ولا لي معه مرجاع=وعذر الرجل يسع جمل والغلط مرجوع
ثلاثه تشكل للمثلث ثلاث أضلاع=وقلبي بعد دونه ستار وقفص وضلوع
وإذا يقنعك ما يقنع الناس بالإجماع=اقسمها على واحد وكم يطلع المجموع
عبدالله المشعلي
القدر بالصدر
العرض العادي
