هذه مجموعة قصائد لشاعره حصه بنت غلاب العتيبي
والدة الشاعر الكبير بندر بن سرور العتيبي رحمه الله
وجميع القصائد رثا في فقيد الشعر الاسطروره
بندر بن سرور
اتمنى ان تحوز علي رضاكم
القصيده الاولي
عديت عصر ودرج الحجــر مـــن ماه
والقلب عيا يستمـــع فـي مشـــيـره
يا ونتي يابــــدر قلــــــت آه ثـم آه
على ثمر قلبٍ غـــدى بـه دبيـــــــره
وجدي على من راح يا بدر وجــداه
وجد الطريح اللي عظــامه كسيـره
خلوه ربعــه فـي نهـار المثــــاراه
رموه عنهـم في نحـور المغـــيـره
جاين لدمع العين يا بـدر مســـقـاه
يسقي القطيع اللي صفت عنه بـيره
لو ينشرا بالمال برهـج ضمــايـاه
صدّر بعد معطان قـاضٍ صـــديـره
عيني تهل الدمع من بعـد فـرقــاه
مثلـي جـداه الدمـع يالله خــــيـره
وا جر قلبي جــــر غـربٍ بعرقـاه
من عيلمٍ عـــوهـن همـاجٍ مريـره
علّق سريحه فـوق زرقـا معفّـاه
هزع الوروك إمتونهـا مستديـره
القصيده الثانيه
ياونة ٍ ونيتهــــا في عيـــــد الاحبـاب
يوم ٍ كل ٍ راح يعـــــايد احبــــــــــابه
قعدت مجبــــــوره علي غير ماطاب
ماكن لي موجود حي ٍ قـــــــــــرابه
يالله يامطلق حكيمــــــات الانشاب
يامدخل ٍ من لاجبه والتجـــــــــــابه
ابرج لقلب ٍ كن فاقصـــــاه جــذاب
غاد ٍ شبــوبة نار ماحــــــــد ٍ درابه
حزنه عمــــيق ماتداويه الاطبــــاب
كل طب ٍ ذكـــــرله يزيد التهــــــابه
عيا يطيب مع الزمن جرح الاسباب
ولاهقوتي ذا الجرح يبرا صــــوابه
فالليل دمع العين يالقرم صــــباب
وضوء النهار عن السفر جــو غابه
لولاي اعدي يابجد راس مــرقاب
واقنب قنيب مجوعات الــذيــــابه
وانوح نوح اللي علي الغصن لعاب
واجور جور اللي عطيب ٍ صــــوابه
تقول يشلع ثومة القلب مخــــــلاب
في وسط جوفي خلب طير ٍ هوابه
عيت تهيد العـــين والقلب ماتــــاب
والعين ماتنسى حــــد ٍ ودهـــــابه
اسمه غدالي يابجد ذنب وحســــــــاب
وحسبي علي اللي يطري اسمه بجابه
لاوحيت طارى اسمه خبث في ماطاب
وراحت ضلوعي وسط جوفي حطـــابه
طويت حبل الياس عقب الرجا خـــاب
وازريت لانسى يابجــــد عهـــــــدنابه
القصيده الثالثه
لولاي اعدي الظهر راس المنيــــــــفات
خطرً شديد الحـــــــــــزن يقظـي عليـه
ياونـةً ونيتــــــهـا عشــــــــــر ونــات
يون مثلي من غــــــــــــــدى لـه شفيـه
يابدر ليته حي يــــــــــرزق ولا مـات
لو هو ورا شط البحــــــــــر ماعـليـه
في الليل كني في البحور الغزيرات
ياخذ بي الهاجـوس يـم الهـــــــويـه
ياخذ بقلبي لاهــف الحــــــر دورات
ويومي بحالي لين يبــست اعصــيـه
يابدر في قلبي طعـــونً مجيحــات
وجرحً على الغالي طعونه خـــفيـه
القصيده الرابعه
ياونة ٍ ونيتها واعمــــــت العــين
والثانيه يابدر شقــــق فــــوادي
النوم ماهملج علي محجر العــين
ولا ذاق نون العين حلو الرقـــادي
ياطير يوم انك تضــف الجناحــين
وتروج من فوق الحضر والبوادي
ياطير ماعينت لي قـــــــرة العــين
عينت طيري ياشقر الريش غـادي
ياطير قهقر بوصفــــــه لك انا زين
ساطي ولكنه عن عدوه حيـــادي
طيري هدف منبوز فج العضـادين
ليا انتهض صدره شناح ٍ سنادي
بين خرش ياطـــير مابين لــونين
مقرنس ٍ ماهـــوب تبـع ٍ اردادي
طيري ماهوب من الطيورالشياهين
نادر بحر تو السعـــــــد منه بـادي
حر ٍ يخلى الكبد ياجهاد قسمين
وحزنه يخلع القلب جوف الفوادي
يالله ياجابر عضام المصـــابين
يالمعتلا المعبود رب العـــبادي
يابارج ٍ ليوب حين ٍ بعد حــــــين
تبرج لجسم ٍ من عنا الحزن بادي
القصيده الخامسه
يابدر كمي الحــــــزن بيـح كنيني
من كثر ماكمى بيح الســــــد كله
سرى علي ابلـــــيس واثره لعيني
طرا علي قلب العنــــــا ولــــعة ٍ له
جداي من بندر اجــــر الــــــونيني
اكامد الخــافي بدمعــــــي واهله
مانساه لو طـــالت علي السنيني
كود نجم سهيل يخــــلف محــــله
واقلبي اللي طار عنــــــــه اليقيني
وانثر دموعي مثل سحابة ٍ مستهله
او شنن ليا حرك غـــداله دنــــيني
لو بل في جــــزر البحر مـــــايبله
ياونة ٍ ونيتــــــها من كـــــنيني
ونت كسير ٍ يسهر اللــــــيل كله
يجظ تال الليل كســـــر الشنيني
فصين من عظم الظهــــر ضايعله
دور السنه فوق المخده حزيني
لا له صديق ولا عظـــــــام ٍ تقله
القصيده السادسه
ياونتـــي ونيتها في حجا الــــــروح
ونة جزع ماهــــي بونة مـــــــــــوده
ياجهاد ضاق بي الوطن وين ابا روح
ولا عاد لي ياجهـــــــــاد فالبقع لده
لولا طويل الرجــــــــــم يابدر لاروح
مير ابدي المرقاب والشــــوف امده
يبدي طويل الرجم من كان مجروح
لولاه يبدي الرجم ينباح ســـــــــده
يويق فالمرقاب لو ماش مصــلوح
ورجله لمبداً فالجبل مستعـــــــــده
مغير اكابد عــــــبرة العين وتفوح
والجسم من قو القلــــــــق راح قده
القصيده السابعه
ياونة ٍ ونيتها ثم فاحــــت العـــــــين
ماونها مثلي ياكود الحــــــــــزيني
واطيري اللي عقب ماضف الجناحين
ورحل بجنحان السعد للشــــــــنيني
جاه القدر وامسن خواته محــــازين
وامه تصفق بالشمـــــــــال اليميني
تقنب قنيب مجوعات الســـــراحين
وتجر صوت ٍ يفجع النايميــــــــني
يالله ياقابل صلاة المصلــــــــــين
ياللي لبيتك لبو المحـــــــــــرميني
يارب عاوضني بعد قــــــرة العين
يارب ابرد واهسي باليقــــــــيني
القصيده الثامنه
يابدر لا سقا الله شجــــرات ٍ مداويح
علي ايسر الخط المسنـــــــــد يسارا
وطيتهنه والمـــــــــــــواتر مشاويح
مريتهن الظهر وسط النهــــــــــــارا
شبحت من بين الشرات المـــــداويح
شوفي بماقف سيد عيني جهــــارا
قلت اوقفو لي يالوجيه المفــــاليح
ربع الدقيقه ياطوال العمــــــــــارا
خلوني اروح ماقفه مـــير لو ريح
وابنشد الميقاف واهـــــــل الديارا
ابنهمه باسمه وناديه واصــــــــيح
جسمه علي اسمه مايعوق الخيارا
انهل دمعي والضماير مجــــاريح
عزي لمن مثلي جـــــــداه العبارا
للحر في كبدي طعون ٍ مجــاويح
وعلي حمل الحزن يابدر جـــــارا
الحزن ياخذ بي ردود ٍ منافــيح
واوما بجسمي بين ليل ونهـــارا
واشف حالي شف ذود المصاليح
شفو غناته مرخصــــــين العمارا
راحت نياقه في يدين المشافيح
واقفو عليها شاربين البهــــــارا
وقف يخايلها دمــــوعه مسابيح
وعقب الغناه امسو عياله فقـارا
وونتي ونت حمام المــــــداويح
جر الغناني فوق هجف البيارا
والا خلوج ٍ جاء ولدها سوامــيح
بكر ٍ سخيف ٍ جاء ولدها الدمارا
مخلج تويق مع الغبا والملافيح
وترجع تشم البو جلد الحــــوارا
جلد ٍ علي ضمت حشيش المشاحيح
احنت عليه وزادها بنهـــــــــــشارا
=====================
وهذه من قصائدها التي قالتها في احد الاشخاص
الذينا لها ملاحظات عليهم
ياصويمـل ماتمـل مـن الـــدوادي
لو ينادي الـزول عنـدك ماتجيبـه
ياصويمل جعـل تاكلـك الحـوادي
تاكـل التفـاح وانتـه ماتجيــــبـه
ياصويمل ماتمـل مـن الجهـــادي
تنطحن فالبيت واخلاقـك غضيبـه
في كفالة مـن يضـدون المعـادي
في (........................ ) معتنيبه
ماركبـت الخيـل فأيـام الطـرادي
ولا ضواك الليل فـي دار غــريبـه
ولا ضواك الليل مكتـوف الايـادي
ولا عوى سرحان وزنك فالزريبـه
ولا حضرت بمعركة نظم التـوادي
في بهـار بـارزن شـره وطيــــبـه
دون حلوات اللبـن قــــرم يفـادي
يعتزي باللي تحـن وتنتخـي بـه
في يـداه مسلـب يفـر الفـــؤادي
ابلـج يمنـاه ماتخطـي الضريبـه
ولا ركبت الجيش ولهن اجتـلادي
والظمى والقيض حاديهـن لهيبـه
ولا كلت رجليك غـزلان الشـدادي
ولا كوتك الميركه فـوق النجيبـه
ولا تدلي بالقلص حبـل الـورادي
في قليـب حايمـن طيـره وذيبـه
ولا طردت الصيد مع بعض الرهادي
ولا رميت الظبي لين انك تصـــــيبـه
ولا تـدن النجـر رمـــــــــز للمنـادي
وسط بيتـن خــــــــاثـر بنـه وطيبـه
ولا تقلط بالصحـن كبـر النـــــوادي
كبش مصـلاح تفرشبـه عصــــيبـه
وسط ربعن كلهـم ضـد المعــــادي
بين خال وعـم وعلـــــومـن عجيبـه
ياصويمل ماحصل غيـر الـدوادي
ماتسـوي مثلهـا والكـذب خـــيبـه
ودمتم
حصه بنت غلاب والدة الشاعر بندربن سرور
العرض العادي
