إن كنت تنشد يارفيقي عن الحال ..! ؟
مالي على كتمانها عنك حيلة
* * *
الصبر عن بوح الأحاسيس قتال
والبوح في بعض المواقف فشيلة
* * *
لو كل مايطري على البال ينقال
ما كان شفت إن الثقيلة ثقيلة
* * *
أبطيت أكافح ضيقة البال بالبال
وأدفع بَلا هاجوسها كل ليلة
* * *
لين أقبلت مثل السحابة بهمال
تشفي غليل اللي تزايد غليله
* * *
طاحت ولا ارهى من حناياك منزال
وأبطلبك ياخوك كتم المخيلة
* * *
إن قيل ترعد قل لهم صوت زلزال
وإن قيل تبرق شف لها ادنات حيلة
* * *
ما أبي تناقلها هل القيل والقال
وتصير من بعد القصيرة طويلة
* * *
ياخوك ماني عال لو صحتي عال
شفني من الصدمات نفسي عليلة
* * *
من كثر ما شفت بحياتي أنذال
بديت أشك إن النذالة فضيلة
* * *
ما طاح من عيني رجل طاحوا رجال
ورجال يابن الناس ماهي قليلة
* * *
أقرب من اللي قالهم ضمن ما قال
راكان بن حثلين راعي الجزيلة
* * *
هذا ولد عمٍ وهذا ولد خال
وهذا رفيقٍ ماندور بديله
* * *
سبحان منهو بدل الحال
وحط الشك بين الخليل وخليله
* * *
وقتٍ به الراعي غدى راعي دلال
كلٍ على طاريه ينفض شليله
* * *
ومن كان ساسه للردي مضرب أمثال
اليوم يحسب من كبار القبيلة
* * *
المال يابن الناس ملعون أبو المال
ذل العزيز وعز ناس ذليلة
* * *
إن كنت تنشد يارفيقي عن الحال ..! ؟
العرض العادي
