ورِّد علومك لا تخلّي دَم سهرتنا ثقيل
ــــــــــــــــــــ والكلمه اللي تستحي منها تعال وبدّها
تعال أسولف لك عن أسرار الشّفايف والهديل
ــــــــــــــــــ عن زمّة العشق وعن الدنيا وزمّة نهدها
عن نشوةٍ عقب العناق وزفرةٍ قبل الرّحيل
ـــــــــــــــــ عن بسمةٍ قبل الطعون ودمعةٍ من بعدها
إن كان في صدرك جزيرة عشق .. صدري أرخَبيل
ــــــــــــــــ كلّي جزاير عشق تخطب من عيونك ودّها
يا امّا أنك تميّل عليّه والاّ أنا صوبك بميل
ـــــــــــــــ والاّ عيونك ردّها عنّي .. وخيلك ردّها
من رمش عينك حسبي الله وحده وْنعْم الوكيل
ـــــــــــــــ تلّت عيونك سِبَّقْ خْيولي وتلّت جنْدَها
في نظرتك مكْر وْ دَها وسْهام وجْنود وصهيل
ـــــــــــــــ الجند جندك والسّهام صْهيلها مَكْر وْدَها
يا كثر حبّي لك ويا صبري على قـِلّ الحصيل
ــــــــــــــ تكاثرت صبري .. جروحي .. واستحيت آعِدّها
صبري يعاتبني على ودّك وأنا دمعي هميل
ـــــــــــــ والله لولا الوِد باحت عيوني سدّها
يا اجمل من اجملها بشر ما عاد لي صبرٍ جميل
ـــــــــــــــ السّالفه ما طالت إلاّ شمّخت عن حدّها
علّقتني في حبل ما بين الرّجا والمستحيل
ــــــــــــــ لا بارك الله في الحبال اللي رجاك يمدّها !
إن كان ما انت بقدّها لا تسدل الرّمش الظّليل
ــــــــــــــ لا تسْدِل الرّمش الظليل إن كان ما انت بقدّها
تعليق