تسألي والناس تسأل=عن سبب قلبت كياني
تقولي وش سر التحوّل=كيف صرت انسان ثاني
ودّي أشرح لك واطوّل=واحكي واكتب لك أغاني
قصتي كانت تهوّل=ما ورِدت بالأصفهاني
كيف كنت اعيش أوّل=كيف مرمرني زماني
كيف عمري كان يذبل=والسبب حظي الأناني
تاه عمري مثل محمل=في بحر ماله مواني
وبعد ما قرّبت أنشل=من كثر ماكنت اعاني
فجأه جاني صوت بلبل=ودندن العود اليماني
والندا ندّا وبلل=تاج زهر الأقحواني
ومالت اغصون اتّدلل=غار منها الخيزراني
والنخل سبح وهلل=نبهه صوت السواني
وعطر النسمه اقرنفل=وفاح ريح الزّعفراني
وصار جلد الأرض مخمل=لبس ثوب الديدحاني
حتى قرص الشمس أرسل=ثوب من نور ارجواني
قالوا قوم الفجر أقبل=قمت واقف في مكاني
قالوا الدنيا اتّبدل=قلت لا لحظه ثواني
هذا محبوبي تجمّل=حن لي عمري وجاني
وقمنا يا عمري نتأمّل=طلّتك يا اغلى الأماني
قالوا صعب الحلو يكمل=قلت شوفوها عياني
كامله والله مكمّل=خلقها وفيها ابتلاني
حتى وان جيت اتغزّل=عاند الحرف وعصاني
والشعر والله يخجل=وتنحني بصدري المعاني
وهذا هو سر التحوّل=ياحياتي في كياني
قرنفل=عويدي،
الديدحان=ورد احمر اللون مخملي الملمس يسمى بالفصيح شقائق النعمان