ياسلام الله على اللي يسدون اللزوم =مكرمين الضيف والجار يامالا الغناه
هات ياعايض علومك وخذ مني علوم = ياصديقي كلنا نعرف القدر وغطاه
=مناحي بن معدي
ياهلا يامرحبا عد ودان الغيوم = يارفيق تكسب الطيب من كل أتجاه
خابر انك يامناحي على الشده عزوم=تطلب العلم القصاوي وعلمك من وراه
=عايض بن حيبان
حط في برنامجك صوم يوم وفطر يوم = ثم تصير ايامكم كلها صوم وصلاه
مشكلتك انك تحط النقط فوق الرقوم =والحروف أم النقط مالها عندك طراه
=مناحي بن معدي
لا توصي واحدٍ يّدّي الفرض ويصوم =ماخذاله منهج مايناسب للحياه
منهو اللي سالم منك ما قد جاه لوم =نظرتك للكل فيها تشره واشتباه
=عايض بن حيبان
نبرتك فيها زعل وانت غالي ومحشوم = كيف ازعل واحد مقدر اوصف غلاه
جيت في مركز دفاع وانا مركز هجوم = دايم اقول لبيه وانت تقول هاه
=مناحي بن معدي
انت حبك مثل حب المصالح مايدوم = لاطراله ينتهي من خلاه وفي خلاه
من تلقى هجمة الناس مجبور يقوم =ماله الا ينثني دون ماله ويحماه
=عايض بن حيبان
روح لام رقيبه تشوف ماضية السلوم =ماعليه اللي لياما اشتهى شي شراه
شوف فيها الذود والناس عايمها يعوم =والقوي لاشاف مسكين قدامه كلاه
=مناحي بن معدي
مالنا في مزاين الذود ذود ولا وسوم =وش نبي بمزاحم الناس ومقابل غثاه
أسمع ان فيها المخاليق زايمها يزوم = وأجتناب مزايم الناس يامناحي نجاه
=عايض بن حيبان
مناحي بن معدي × عايض بن حيبان
صحت السنتكم وبيض الله وجيهكم
على هذه المحاورة الرائعة