هذي القصيدة للشاعرنا يجاوب بها ابنه الصغير حمد عندما اخذ يسأله عن اشياء ولا يدرك معناها
لصغر سنه وجاوبه بهذه القصيده
قم ياحمد يابوك عن حافة البير = كب الحكاء يامسندي والدوادي
تسأل وانا اجاوبك لكنك صغير = من صغر سنك مافهمت المرادي
لكن تفضل خذ جوابي بتعبير = من ضامر يقدح سواة الزنادي
عند المكينه نربط ابها مسامير = بجذب بها الماء يامضنه فوادي
نسقي بها يابوك غرس جبابير = غرس عطانيها رب العبادي
غرس عطانياها والي المقادير = اللي رفع سبع بليا عمادي
روابخ في وسط جاش معاطير = لجلك بذلت بها جميع اجتهادي
من فضل رب دبر العبد تدبير = شريتها لك يوم نادى المنادي
سقنا بها الموتر وسقنا الدنانير = لجل يجي لك وسط جاش ابلادي
تصير لك ملك يخصك عن الغير = وتغنيك من بعض الربع لقتصادي
وانا برجو من يسوق المعاصير = يحيك لي ويحط فيك السدادي
تكبر وتكفيني ببعض المشاوير = وتسنع صغار النخل والعيادي
حتى الى جاك المسير على خير = تقدم الدله وتمره قنادي
مع ماتيسر يازبون المقاصير = من كلمة ذربه ومي وزادي
في مجلس مادنوسه المعاثير = مايدهله راعي الدنس والفسادي
ماديهله يكون ربع بهم خير= كل ابلج في طاعه الله انقيادي
مجلس شرف مايروده الا المناعير = على المعزه مدهل للعوادي
من ظمن ربع يكرمون المسايير = ربع عساهم دايم بالمرادي
ذباحة للضان لوهم معاسير = لو كان مابه غيرها في لصادي
قوم بحزات الملاقا مغاوير = الاد مسرد مرهقين الاعادي
ربعي مسارده تكف الطوابير = لطامة العايل نهار الطرادي
يوم الملاقا يحتمون المعاشير = لو كان كثر القوم مثل الجرادي
خيالهم لامن اعتزاء كنه الزير = من هيبته يهتز حتى الجمادي
لا ما اقبله خيل وخيل مدابير = وجاء الاشتباك بمرهفات النهادي
يهدرون الانفس والصاير يصير = وظرباتهم للضد بين الثنادي
كل ابلج ينس براسه سعاطير = لاثارة الهيجاء بنفسه يفادي
يسوقها للموت من غير تفكير = حتى يرد مقرقعات التوادي
من دونها ماسمع عذال ومشير = والضد من فعله يشوف النكادي
وشيخ العداء عشاه عكف المناقير = وخده على البيداء بليا وسادي
ذا فعل ربعي بالسنين المغابير = ايام عز السيف هو والجوادي
قلته ولا بكل القبايل تقاصير = فالكل به حقه نهار الطرادي
من غيرنا من يحتمون المظاهير = بأمات خمس والسيوف الحدادي
ايام ذاك يصيح والثاني يغير = اما صباح الشوم ولا هجادي
اما اليوم اسلام وامان وبخير = انعام ماتحصى لنا بالعدادي
من يوم ابو فيص لها واصل السير = من شرقها مثل الاسد وصل عادي
عبد العزيز مصخر الضد تصخير = اللي بيد عجلان ثنا القيادي
بسبعة انفار وحكمه وتدبير = خطط ونجحة خطته بالوكادي
بشجاعته داس الحرس والنواطير = حتى ظرب عجلان بين الثنادي
كزه بسيف يكسر العظم تكسير = والنعم ياشيخ بثاره ينادي
يقول حكم الظلم يحتاج تغير = وألبس جزيرتنا ثياب جدادي
ثم قام حكم الشرع من غير تقصير = يقول لله نيتي واعتقادي
حكم بقول الله من غير تغير = والمشركين اعلن عليهم جهادي
سدد وقارب وبدل الهدم تعمير = وجمع قلوب الناس على الرشادي
جمع قلوب الناس من بعد تنفير = صيرهم اخوان بعد الابتعادي
خل عمر وحمود وابجاد وعمير = بعد التفرق ساكنين بوادي
بأرادة من عند ربه وتيسير = وحد جزيرتنا بحكمه وسادي
ومن بعده عياله بنوها بتسوير = صارو لها سور قوي شدادي
سور منيع ماتهزه الاعاصير = يمن ويذري من هبوب البرادي
بسياسه فذه لها اكبرهم يدير = واخوانه عضوده صقور الهدادي
بالداخل يعمر ويبني بتطوير = والشعب شجع حضرهم والبوادي
وبالعالم الخارج يدير التفاكير = محنك يصيد ولا يصادي
تحته رجال يرفعون التقارير = في كل يوم عن لزوم البلادي
حاول يوفر لنا الخير توفير = من شاننا صالح وعادى وذادي
والارزاق وردها لشعبه قناطير = والجيش ورد له حديث العتادي
مدافع ومدرعات بجنزير = والناقلات اللي تبوج الريادي
وذخيرة ومصفحات و طيايير = كل الدول تعلن بها فالروادي
مع صواريخ بها زود تفجير = منها معادينا يشوف النكادي
هذا وصلو عد ما غرد الطير = على رسول للبشر خير هادي