القصيدة
بين الهجوس ودمعة الحبر والطرس=لاحت بروق القاف نقضه وفتله
ونا قبل هوجنت للهاجس بهمس=هجنٍ عمانيات قد نوختله
داست موطيها مع الحاجر الدرس=وقفت وهي عجله ولا تلتفت له
تبي بساتينٍ نبت وسطها الغرس=والي سقا من صافي الجم شتله
الشاعر الي له معى اهل الشعر درس=المشعلي عبدالله اليوم جتله
يا بو محمد تحكي العرب و الفرس=عن حب لليلى و الملوح وقتله
وانت الذي دايم مع اهل الهوى رمس=تعرف مراسيل الهوا وشنوتله
والجادل الي تزهي النيل و الورس=كم عاشقٍ يحكي وهي ما حكتله
والي يجهز حملته من قبل امس=عيت بنات العيس ما درهمتله
والشارب الي غره الرب بالحس=صيده ختل لكن ما زان ختله
وانت الذي علمته الرمي بالقبس=لكن شانت نيته وحتفتله
وانا لقيت اثر السبع وطيها نمس=يبي يتسيبع والذيابه درتله
واليوم يا عبدالله الوضع به لبس= بعد الكتاب الي عربنا قرتله
وانتا عن الاحداث متحيز وشرس=وان مرك الامداد دمرت رتله
محمد بن هذال
الرد
قريت ما خطه ( محمد ) على الطرس=واللي كتب ما كادني نقض فتله
عوص النضا اللي جات متروسةٍ ترس=نوختها من عقب ما نوخت له
شفت أثرها توه جديدٍ ولا درس=واللي يشدّك يجبرك تلتفت له
لفت وملفاها على واحة الغرس=فيها عناقيد الثمر ناوشت له
كلٍ خذا له من دروس الزمن درس=وأهم شي اللي لفت له وجت له
والفرس لو تصبح عرب والعرب فرس=ما نختلف و( مسيلمه ) حل قتله
ولاني وكيل العمي والصم والخرس=والله علم باللي نويت ونوت له
لا تنشد الجادل وعشّاقها وأرس=مثل الجبل لا يهمك اللي حكت له
والسوس ما له طب كن يخلع الضرس=ترهيمته بازت معاد ارهمت له
و ( أبو شنب ) خذا من التجربه كورس=ثم انتخا في عصبته وأنتخت له
يجهز ثياب المعاريس للعرس=غير العروس الغاليه ما احتلفت له
والمشكله لا جات بالقير والترس=واللي بظهر الحافله ما درت له
وشعار ( تويوتا ) على الجيب واليارس=وانته وأنا من العالم اللي قرت له
أحيان أجي شرس وانا ماني بشرس=واحب من مسترسل الهرج رتله
عبدالله المشعلي