حبيي الحزن لا قلّطتك عيوني =رتب كنب ضحكتي في مجلس اهدابي
وتمرك عوج الحنايا وافرش شجوني= أنت المعّزب وضيفك باقي أعصابي
مابعدك الاّ التعب واقصاك من دوني = وما قبلك الاّ ضعون الصبر وركابي
وهذي فراغات عيني من ورى نوني = تغرف من الصمت دمع وتسقي كتابي
والصمت عشعش على شفاهي ومكنوني = قام يتعرّش من الحسره جذع نابي
وجريد وجهي عسيبه يبس ومزوني =جهّت قبل لا تلقّح بكرة ترابي
والشمس ترقى السما وتهل بـ جفوني =قطرة عرق من جبين الوقت تندابي
والمغرب اللي يصب من الغسق لوني= وشلون يمحى الضيا في لوحة غيابي
حبيبي الحزن بسولف على ظنوني = مليت اسولف على غيري وانا مابي
بردٍ تنحنح وحيفه وأرعب غصوني= وأشعلت من منقد العشاق مشهابي
وأكن تبغ والوجع ويكح غليوني = من مابي اللي يضيق بـ كثر يامابي
والصبر مفتاح والضيقات صكوني= من وين بـ القى الفرج لا سكروا بابي
مليت اجي لك من الضيقه على هوني = ومليت اروّح وأنا اتعابي هي اتعابي
قلت اتوكا على اصحابي وهدوني = على رفات الدروب وضيعة احبابي
عرفت بـأن الوجيه أشباه بـ عيوني = أصحاب حزني ولا لـ أحزاني اصحابي
حبيبي الحزن تدري ويش بردوني= شيٍ سترته على ردونك وعرابي
ثيابي أول افصلها على متوني = ومتوني اليوم أفصلها على ثيابي