سلام يالطرقي عدد ما ساقت النود السحاب = يا شاعر عنده ثقة في النفس والمخرج ملي
ما هو من اللي يختلف لا عض ناب فوق ناب = اعرف نظامة مايسير بعكس والمخرج ملي

يامرحبا بك ياقحطاني بعد ماطال الغياب =اطلع بمطلاعك طلوع الشمس والمخرج ملي
مليت مدحك ببجديات التشره والعتاب =ماتدري ان اليوم غير الامس والمخرج ملي

تزعل وانا باقي مقفل للمعاني كل باب = وراك يابو زيد شكلك عمس والمخرج ملي
ان لم تكن ذيب على ماقيل تاكلك الذياب = ياللي تمشى من جيان لمكس والمخرج ملي

انا ادري ان بندق سعد مشحونه وفوق الزهاب =البندق ام الخمس فيها خمس والمخرج ملي
الله يجنبنا الخطاء والله يقدينا الصواب =واعرف قلبك كيف احمسه حمس والمخرج ملي

مالي ومال البندق اللي راح راعيها وغاب= اللي يثورها الرعد واللمس والمخرج ملي
وش ذا الحروف اللي لفتنا زايدة وسط الكتاب = لكن نبي نطمس عليها طمس والمخرج ملي

ياطير شلوى من تنشّد لازم يلقى الجواب =اما اخذ ليلك باوله والا امس والمخرج ملي
الله يعينك تحتمل جور الشدايد والعذاب =من قبل طمسك يابعيد الرمس والمخرج ملي

هذي السنة شبنا وهذيك السنة كنا شباب = والطايرة تحتاج طول وكبس والمخرج ملي
حنا على حسب السؤال اللي يجي نعطي جواب= وانته تمشيها ضنون وحدس والمخرج ملي

مادام شايب ويش حدك للذهاب وللاياب=ريّح ضميرك يالهلاله وانس والمخرج ملي
اظن فيك بظن طيب وياعسى ظني ماخاب =لازال فهمك فيه مثل البس والمخرج ملي

تراك لا طال المدى ياشيخ نوخت الركاب = تصبح سواليفك شوي وهمس والمخرج ملي
على عيونك يا زميلي من بعض الاشياء ضباب = جنك تعاملهم معامل الانس والمخرج ملي

ما هوب انا اللي تقصر اعزومه من حدود الصعاب =وعلم الحيا قد جاك لكن عس والمخرج ملي
كل على حسب العمل يجزاء و دقق في الحساب = والله ما نخصم عليكم فلس والمخرج ملي