المساعد الشخصي الرقمي

مشاهدة النسخة كاملة : حسن المسعودي +خالد نايف .. قصيده اف طائرة اف 15


خالد بن نايف ال مسعود
17 / 02 / 2003, 36 : 08 PM
هذه القصيده ارسلتها للشاعر
حسن المسعودي
وقد قام بالرد
رغم انها قديمه ولكن احببت نشرها
في هذا المنتدى
وكل احداث القصيده واقعيه

يالله ياخالق من الناس جنســين= ياربنا اللي كلنا مرّتجيــــــنه
يامنزل القران بالشرع والدين= ياللي عباده بالدجــــا عابدينه
اغفر لعبدك يوم وضع الموازين=يارب الأقصـــــى والحرم والمدينه
وابدأ بذكرك ياملاذ المسـلمين=يامنجي عبده فوق الســــــفينه
بنات فكري غابت وجـات ذالحين=ترسم في افكاري بيوتٍ ثمــــــينه
تاخذ من الزينات مانقبل الشين=والقلب تظهر مــــاوزى في كنينه
خاطبتها واقول لآوين لآويـــــن=همـــــك لمن بعد الولي تشتكينه
قالت حسافه كيف تنسى الفطينين=اهل الشعـر واهل العقول الفطينه
بنصى الشجيع ابن الرجال الكريمين=اللي ربــوعه بالكرم خابرينه
قلت ابشـــري لكن تكفين تكفين=القلب بعـــــد اليوم لآتتركينه
وياراكبٍ من عنــــدنااف ففتين=ماطـــــورها حسب الطلب صانعينه
وفلابها ودفوفــــها والجناحين=اليـا اقلعت في الجو تثبت رزينه
رادارها صمم لكشـــف البعيدين=كشـــف الدقيقه قبل كشف المتينه
اما المحرك يدفـع ابقوة الفين=وطبعــة اترايستار فوق المكينه
وطيارها متخرجٍ قــــدله اسنين=اليا طـــار ماقامت تراقل يدينه
يلعب بها في الجو مثل الشياهين=امثبــــــتٍ نفسه بوسط الكبينه
واصله يعود للرجــــال السلاطين=اهـــل الكرم والعز هم كاسبينه
ثم جهزوها يالرجال الخــبيرين=ثم اجعلوا فيها الوسايــل الامينه
دقـــــايق الرحله ثلاث وثلاثين=الوقـــــــــت سجلناه ومحددينه
وطريقها مرسوم مابين خــــطين=الدرب فــــــي رادراها راسمينه
ثم اسمحـوا بقلاعها يوم الثنين=طيارها ربي عليها يعــــــــينه
بعد صلاة الصبح والنــاس هادين=اصواتها تكسر اجـــدار السكينه
وقبـل شروق الشمس تنزل بدارين=في المهبط اللي كلنا عارفينـــه
ينـزل وينصى من يسود الميادين=ابو علي ياجعــــــل تكثر سنينه
قله ســـلامي عد من يسكن الصين=وعـــــداد سكان القرى والمدينه
سلام عطرتـــــه بورد البساتين=بعد اختلط ريحـــــانه وياسمينه
وقـله ترى خالد غدى بين نارين=ويشـــــــوف حلمٍ ماتطوله يمينه
وقـله انا محتار مابين ألأثنين=ومن بيـــــنهم روحي ترها رهينه
ألأول حبيب الروح سيد المزايين=زين الطبــايع والوصوف الحسينه
شوفه شـفى قلبي وبعده عمىالعين=لكـــن حالوا الناس بيني وبينه
والثاني انته تعرفه ياحسن زين=برواحنــــا طول الزمن مفتدينه
واليـــاأمر بالأمر جينا مطيعين=صــــــــويب رايه كلنا ماخذينه
يقول يالمقرود وشلك بلأقصـــين=واقـــــول روحي في هواهم سجينه
واليوم تكفى ياحكيم الحـكيمين=الحــــــــل منك ياحسن محترينه
طـــــــرحت قدامك قضية محبين=هـــات الدوى لهل القوب الحزينه
وصلاة ربي عد من تنطـــق السين=عــــــلى الذي مرسله ربي بدينه
خال بن نايف ال مسعود
وقد رد علي ابو تركي بهذه القصيده

بسم الذي ذكره يهز الشيـــــاطين=رب الملا محيي العروق الدفينه
واحد احد وآمر جميع الثقــــالين=واللـي يخالف طاعةأمره يهينه
ربـــــــاًخلقنا من سلاله ومن طين=وعمر البنادم كاتبه في جبينه
اللي نصر لسلام في بـــــدر وحنين=واحبط يهود الشرك واهل الظغينه
اساله الرحمه ومجـــــد المجيدين=وجنان عدن الللي ذراها كنينه
وبمرك يارب البيت تنصـــر فلسطين=وتقضي على شارون ومناصــرينه
يارحمٍ التايـــبين المنـــــيبين=يــــاربنااللي كلنا نستعينه
ياعــــــالمٍ خافي خفايا المخفين=عـــــلام بالنيات زينه وشينه
عليك متــــــــوكل وللخير راجين=ولآخاب من ربـــه بوقته عوينه
بعده هلا بالخــــــط واللي مودين=يامرحبــــابه هيل ياكاتبينه
يامرحبا حــــــي الوصي والموصين=حيه وحــي اللي بعد مرسلينه
يامرحبا وهليــــــن وهلين وهلين=باللي وصل بالخـــط ومكلفينه
خطٍ لفاني واضــــــــحٍ بالعناوين=مع هل الطالات متذاوديـــــنه
وصلوا على اللي تقطع البعد في حين=ماساقها الــدواج ومصاحبينه
وصـــلوا صقور الجو سقم المعادين=مثل الدروع القاسيات الحصينه
نســــل الرجال الطيبين العزيزين=قـــومٍ شموخ الطيب متقاسمينه
علــــــــيانيٍ منروس قومٍ شجيعين=تاريخـــهم كل العرب خابرينه
والمشعـــــلي قرمٍ خويٍ على الدين=منلآبتاً مثل السيــوف السنينه
رحبــــــت والترحيب من خاطرٍ زين=يفرح لياشــاف العرب واصلينه
قلت العــــلوم وقلوا اليوم لآفين=معنا جـــــوابٍ يمكم حاملينه
قـــلت ارحبوا ترحيب غالي بغالين=حيـــــاالله المرسول ومّرسلينه
إلكم عــــــلينا حق سلم وقوانين=الله يحيكم على كـــــــل عينه
عــلى الشحم والعود ألأزرق وكيّفين=البنألأشــقر والعلوم السمينه
تريضـــــوا في الدارلوكان يومين=ترى بلدنا زهــــوته زايرينه
قـــالوا ترانا يارعى الدارعجلين=لآتكثر ألأديــــان ماهي بزينه
هــــــذاالجواب وحن نسلم وماشين=مع الســــلامه قلت والله غبينه
هـذا الجواب وقلت يالربع من فين= قالوا تبا تلقى جوابه وسينه
راحـــوا وانا جلست افل المضامين=وعـرفت راعي الخط عاشت يمينه
خالد ولد نايف سعــــاط المجانين=لآشي من شـــين الطبايع يدينه
قريت خطـــــــه قلت ياحي ذالعين=الـــشعر من صوبه قرارٍمكينه
السطــــــر ألأول للقصيده على اين=والسطرالآخر في القصيده على اينه
ولقيت في دعواه شــــكوى المودين=اهل القلوب المرهـفات ألأنينه
يشكي عــــــلي منحرفرقى المحبين=ذاق العنا من بعد فرقى ضنينه
وايضاقسم موضـــــوع شكواه قسمين=يبغى حبــيبه والعرب مانعينه
يبغــــى من ألأقصين ماراد ألأدنين=واهله يبون امنألأقارب معـينه
ويقــــول انا محتار مابينألأمرين=ايت لمور اتقول شينــه وزينه
اقلت استممـع دام ألأهل ماش راضين=من يرضي الله يرتضي والدينه
وان كانها بالحــــب قبلك براهين=شعرو جميل ماتخـــــلا بثينه
وانا معـــك يالقرم بالعسر والين=واللي تبـــيه وكل شيءٍ بحينه
بالجاه وألآالمـــــــال ولآمغيرين=اللي تبيه آمر وحــن واصلينه
وصـــلوا على خير الرسل والنبيين=صفوة قريش وكلنا تابعـــــينه
حسن المسعودي
ولكــــــــــــــــم خالص تحياتي
خــــــــالد نايف ال مسعود

محسن المسردي
18 / 02 / 2003, 06 : 02 AM
صح لسانك يابونايف

وصح لسان أبو تركي

والله يكون في عون المحبين

والله يعطيك العافيه

تحياتي،،،
.
.

المسعودي
24 / 02 / 2003, 13 : 03 PM
ابو نايف


ابو تركي



ما قصرتوا


عز الله انه قصيدة رائعة


المرسلة والرد




وقصيدكم نبيه قديم وجديد



ولا تبخلون به


اخوكم المسعودي

الشامخ
14 / 04 / 2003, 55 : 08 AM
السلام عليكم ورحمة الله وبركاته

صح لسانك يابونايف

وصح لسان أبو تركي


ماقصرت يابو نايف ولا يهون الجميع


ودمتم


اخوكم ابو عمر

خالد بن نايف ال مسعود
30 / 04 / 2003, 16 : 01 AM
الاخـــــــــوان الاعــــــــــــــــــزاء




محســـــــــــــــن المســــــــــــــــــردي



































المسعــــــــــــــــــــــــودي





























الشـــــــــــــــــــــــــــــــــامخ





















مروركم هنا يزيد القصيده فخر




لاعدمنـــــــــــــــــاكم



صــــــــــــــحت ابدانكم




اخوكم خالد

فارس الدوحة
09 / 05 / 2003, 31 : 02 PM
أخي العزيز خالد


صح الله لسانك


أخي العزيز ابو تركي


صح الله لسانك


أنا أشهد أنكم شعرتوا


و عز الله إنها من الروااائع


سلمتم على هذه التحفة


و السموووووحة يا بونايف

على التأخير

أخوك : فارس الدوحة :مبسوط:

خالد بن نايف ال مسعود
01 / 08 / 2003, 24 : 06 PM
اخي الغااااالي



فـــــارس الدوحـــــــه



انت من الاعضاء اللي نتشرف بمرورهم

والله يعطيك العافيه على كل الاحوال


والطيب مايستغرب من الطيبين





اخوك

خالد نايف

الساهر2003
04 / 08 / 2003, 47 : 01 PM
الله يعطيكم العافيه اخوي ابو نايف انت واخوي ابو تركي على الابيات الجميله والرئعه


واتمنى المزيد من الجديد والمتميز في المعني والابيات

تقبلوا تحياااااااااااات ,,,


اخوكم
الساهر2003 :غمزه:



m