اطلب ابو راكان للمحاوره

[أبو فيصـل]

ياسلام الله على اللي لهم باع طويل= والمعاني يامناحي نبي مضمونها
الله يدلك على الحق كان انك دليل=اكشف المستور والملعبه بفنونها

[مناحي معدي المسردي]

مرحبا بك ياعميل يدور له عميل= روح في شونك وخل العرب في شونها
والله انا مانبي في الجميل الا جميل = وان كشفنا راسها وش يخش قرونها

[أبو فيصـل]

ماني بتارك تاخذ وتعطي كل ليل =والعرب ياذيب قامت تعرك عيونها
الجزاله يامناحي تبى العلم الجزيل=كان تكشف راسها بدلي مادونها

[مناحي معدي المسردي]

ياسفير الحب خلك مع العالم ثقيل = ماعرفنا صاحي الناس من مجنونها
مادرينا عن شعورك بعد ذاك الرحيل=انت مدري من ورى دبي والادونها

[أبو فيصـل]

الثقل صنعه واظنك تدور مستحيل=طبعي المعروف ماغيرته سنونها
السؤال اللي سالته يبي علم (ن) قليل=لاتبعدني بعيد وتجر لحونها

[مناحي معدي المسردي]

ما لقينا في سباق الجمال الا شعيل= والذياب الجايعه له تحد سنونها
ياسفيرالحب مانته على العالم وكيل= مشها مادام تمشي حسب طبلونها

[أبو فيصـل]

الله لامنه عطا ماترده يابخيل=وخنجر(ن) ماتذبحك لاتخاف طعونها
يكفي انه في ضيافة هل العلم الجليل=الشيوخ اهل الكرم ماتغير لونها

[مناحي معدي المسردي]

والله اني عارفك لاتحط ولا تشيل = شجرة الزيتون ماحد كلا زيتونها
ليه ماتزهم ربوعك مزمبنة الدخيل= جعل كبد الجاهل تموت من طاعونها

[أبو فيصـل]

كل عصر يامناحي وله جوله وجيل= وانت لاتنكر على الناس في قانونها
والله اني من ربوعك ولاني من هذيل= ونخوة الفرسان معروف من يحيونها

[مناحي معدي المسردي]

لعبة الاطفال بين المقابل والقبيل = انفخوا بالونها وفقعوا بالونها
اعرف انك من بلد جاش يا الاصل الاصيل= بس قصة فقرك الناس مايبغونها

[أبو فيصـل]

يكفي ان العين شافت رعى الطرف الكحيل=يوم ضيعت الصلاة ونسيت ركونها
دامها بي معجبه ماعلي من كل قيل=وانت لاتمسح عيونك تبين حزونها

[مناحي معدي المسردي]

تحسب انك لاحلقت شنبك تطلع جميل= ليت بعض علومك الناس مايطرونها
لو تبيها لك خليله ماهي تبغي خليل= خل باقي بضعتك في وسط كرتونها

[أبو فيصـل]

انت لاتحكم على شي ماعندك دليل=العرب تبني واشوفك تهد ركونها
صاحبي باشه ولاله بخلق الله مثيل=والبضاعه غيرك اليوم من يشرونها

[مناحي معدي المسردي]

انت اشوفك كل ما ميلت معها تميل = لا تدربيها ليا قاموا ايدربونها
في الحقيقه صاحبك ضاع في الخط الطويل=يحسب انه من وراهاوهومن دونها

[أبو فيصـل]

انت لاتجعل خوار البقر مثل الصهيل=فيه فرق بين روس العرب ومتونها
صاحبي من روس قوم على العادي تكيل=يعرف اللعبه وغيره جهل بوزونها

[مناحي معدي المسردي]

مانبي من حضرتك لاكثير ولاقليل= وانت ناس زين معها وناس تخونها
لاتمد ايدك على الزاد في ظلما وليل= خل زاد ام المساكين في ماعونها

[أبو فيصـل]

ضاع حيلك يامناحي ولالك فيه حيل=والخيانه واضح كل من يمشونها
في ليال البرد لاتشرب الا زنجبيل=مادرينا داين الناس من مديونها

[مناحي معدي المسردي]

قمت تمطر يامطرنا لكن ما سال سيل= وابلعتك الارض واصبحت من مخزونها
لوتركتك دون علمه وخايلت المخيل=ضيعتك النوه اللي تهل مزونها

[أبو فيصـل]

شمر اهل الطيب كل العرب الها تحيل=ودي انك انت ولي معاك تجونها
تخبرك دار الكرامه عن المزن الهميل=قصة كل العرب ياولد يقرونها

[مناحي معدي المسردي]

انتهينا وانت باقي تناظر في سهيل=يوم غيرنا هدفها عجزت تصونها
انتهينا من الاساسي وحضرنا البديل=وانت باقي في السعيده تعد سكونها

[أبو فيصـل]

كيف بدلت المدافع علي باحمد كميل=لاتحسب ان الجماهير قد يرضونها
ليه تدعي صاحبك ثم تنوي بالرحيل=ماعرفنا مذهب اللي وساع بطونها

[مناحي معدي المسردي]

انت واصحابك سفركم بلا زاد وصميل =وان عطتكم بنت الاجواد ماتعطونها
مستحيل الوقت الاول يعود مستحيل=حط نظاره على العين لايعمونها

[أبو فيصـل]

شلتي ناوينها حرب ماتبقي تزيل=واللحوم الميته بالجمر يشوونها
البنيه شامت لفارس ماهو ذليل=لزهمته يقول لبيه لجل عيونها

[مناحي معدي المسردي]

دلة بهارها هيل مدري زنجبيل=وشلتك لضحى الضحى قاموا ايزلونها
والبنيه راعية كيف والصاحب عليل= لاخفضنا ضغطها ينتفخ قالونها

[أبو فيصـل]

مالنا يابومعدي بها غرس ونخيل=واهل النيات فيما مضى ينوونها
قهوتك مسحوقها مر ماهو سلسبيل=والحبوب اللي براسك وقف طاحونها

[مناحي معدي المسردي]

كان ضاقتبك ترى عندنا بيع وسبيل=القصيدة فدوة الربع مايفدونها
الرجال اللي تشيل المقمع والفتيل= الحروف كبار لكن مايقرونها