فلاح لاعادت قصيدتك اللي سويتها = من بعدها ارزاق العزوبه من البلد متقطعات
ناس تبيع وتشتري فيما مضى خليتها = تصتك وسط بيوتها والسوق خلي من البنات
ياللي تعاتبني على كلمات حق ابديتها = ما اخطيت فيما ابديت من شان استحق معاتبات
بنشدك هلى ترى تشوف اختك تغادر بيتها = من يوم تصبح للمساء تجي وتروح بلا عبات
اختي ترى مرضى تطريها ولو طريتها = ماني بأدنق رافع راسي خذ العلم الثبات
محصنه مصيونه ماتويق لا مريتها = لاشك ماتعرف لبيع ولا شرى ومساومات
مادام لاطريتها ماقد بعد سميتها = تزعل من الغيره ولاتقبل مجال مفاهمات
ويش لون تستنكر قصيدتي اللي غنيتها = امر بمعروف ونهي ياحمد من منكرات
عز الله استنكر بشده من بيوت اوحيتها = من عبرها تيار كهربنا انقطع والنور مات
حجبت شمعات البلد بروايتك واعميتها = من عقب ماهي في دكاكين البلاد مولعات
انت الذي تبغى تطفي الضو لاشبيتها = رايي ورايك ياحمد ترى متخالفات
تبغى تخرب سمعة الديره وانا حنيتها = ما باغى يصير بها تبرج ودلع ومغازلات
مطوع وان شفت لك غرة صيد ماخليتها = وتبغى تشوه سمعة العالم بنشر الشايعات
ودك تداويها ولكن يافلاح اعميتها = مالك ومال الناس واتق شر رجم المحصنات
انت الذي تعمي لوما ولابعد داويتها = قلبك عمى لو كانت عيونك صحيح مفتحات
واظن لوعندك مره عن درب مارديتها = لو كان تعمل متريد وتشتهي طول الحيات
ماني بقايل شي دامي مابعد لاقيتها = الهرج بالفايت علامعه للعقول الناقصات
ياسعد ابو من شافها وسمع صويتها = في وسط بيته كالحمامه وسط نورا النبات
اخاف لو تعرس على هالحال ماضميتها = مغويك شيطانك ومشغوف بطرد الغاويات
دامك تقنص للحمام وعادتك مالغيتها = ماهو بمتهيئ لك الرزق الحلال ابدآ بتات
ماني حرامي والقصيره مابعد سبيتها = لو غاب واليها عن الديره ولو عشر سنوات
انت المغاوي اللي غدرت الناس لين اغويتها = واللي يحاول دورة العيشه تقفيه كلمات
العاقله والمستقيمه مابعد سبيتها = ظلم وتزوير وتزيف وكذب وابتهات
لاشك رجل حرمته بالسوق يظهر صيتها = تكفى عسى يضرب على نجفه بعشر مشوكات
ياللي تشيل بيدك ساعه مختلف توقيتها = غرتك وهي موخره وابطيت والقيطار فات
مخك محجر والدروس اللي درسة نسيتها = ماتدري حتى النساء قدهي تسوق الطايرات
ياللجرب اللي لو تعرر بالحصاه اعديتها = لو صمت لو صليت مالك لاصيام ولا صلات
ولو طاعتك امه محمد كلها غشيتها = لاشك تب واطلب من الله العفو واطلبه النجات
انا احمد الله اللي علي من الفروض اديتها = اصوم وادفع فطرتي واحج واسوق الزكات
وجميع مالي من ديون كلها استقضيتها = اللي لي استقضيته واللي على الله باقيات
انته تبي درب الحقيقه بس ما ندليتها = تحسب حياتك باقيه ماهو بقافيها ممات
ماتدري انك بطاعتك نفسك ترى ضريتها = احسب حساب الاخره والباقيات الصالحات
احاول ارفعها ولكن يافلاح ارخيتها = اتبع طريق العافيه والحق يازين السكات
لوكنت متحديك انا بللغاز ماحليتها = ارخيت لك بالحبل واشوفك تهبدت العظات
عليك بيبان المعرفه كلها سديتها = وانت الخبير اللي معك دبلوم في كل اللغات
للغاز كل ارموزها بالقافيه فكيتها = لكن توقع لايصكك في قدم رجلك حصات
ما اريد امس لك الحبال اخشى الى مسيتها = تثوى ولاتقدر تقوم الين اصكك بالعصات
والسالفه شابت معانيها وانا مليتها = غير لنا الموضوع ياشوق البني المترفات
يالشاعر اللي تحيي الحفلات لاطبيتها = كم ليلة يمسون خلق الله وعينك ماتبات
لاشفت لك حفله فرح عرس يولع ليتها = طبيتها بأنشدك وش الفايده من ذا السوات
ماكل حفله شفت كهربهاء يولع جيتها = كم حفلة ما ازورها لو كتب لي عشر دعوات
ياكم وكم حفله فرح لاعدها ما احصيتها = ارفض دعوات اهلها الا لبعض مناسبات
ماني بسالك وانشدك كم دعوه لبيتها = انشدك ويش الفايده عجل وهات الرد هات
ويش استفدت من الملاعب طول ماحضيتها = يوم انت واقف كل ليل بها عيونك ساهرات
ربعي الى جاء عندهم حفله فرح عزيتها = دام الصفوف وقوف بارسي كالجبال الراسيات
وان كان جاهم زله من شاعر استقضيتها = والفايده ذرب القصيد الطيب اللي له طرات