تبسّم لعنبو من لامني في بسمتك وارضاك
.... تبسّم لعنبو من يزعلك وانته مصافي له
علشانك خضع قلبي وسلّم للهوا وأعطاك
.... مشاعر صادقه مني عليك القلب ياويله
ملكت الروح واحساسي بدون مناقشه وادراك
.... قناعه؟ أو أمر سامي ؟ ملكته مابدي حيله !!ا
سريت بداخل عروقي اقول أهواك ثم أهواك
.... وصار القلب مملوكك وضوّى بالأمل ليله
وتدري بالغلا كله حبيبي ماقدرت أسلاك
.... على مشوارنا نمشي وكل الشوق لك سيله
انا ماهمني غيرك ولايطري علي أعصاك
.... عليك الله وأمان الله ولك قلبي وقنديله
برغم الي حصل منك وفيت وماقدرت أنساك
.... وصنت الحب لعيونك ولاأرضى بتبديله
هجرت وشان بي ظنك لجل منهو كذب واغواك
.... وطعت أهل الحسد فيني هل النمّات والحيله
سمعت من الخبيث الي نوا لي بالغدر واعماك
.... حسود ٍ مايخاف الله كثر جوره وتضليله
مصيبه كيف أثـّر بك وقوّا قلبك وقسّاك
.... حقيقه ضابط ٍ دوره أكيد أبدع فتمثيله
أنا كل ماذكرت اني رجيتك.... >> مِدّ لي يمناك
.... ودمع ٍ طاح من عيني غرق بالكف منديله
أنا لولا الغلا ماقلت لك تكفى ولا ترجاك
.... خذلني حظي العاثر ( ويادنيا من أنتي له )ا
حبيبي ماحدن غيرك ولايمكن حدن يسواك
.... غريبه كيف قانونك يـبـيع الحب ويزيله !!ا
وجاد الحظ في يوم الثلوث وساق لي ممشاك
.... وشفتك مقبل ٍ يمي وهذي من تساهيله
لمحت الدمع بعيونك ورجفة وجنتك واشفاك
.... تظنه مستحيل يعود لك حبي و تعليله
تطمـّن يانظر عيني أنا لك والعمر يفداك
.... ولك ماضي حياتي والبقيّـه في مقابيله
ياعمري يابعد كلي احبك لاتظن أجفاك
.... ولو طال الزعل منك وذقنا من غرابيله
وسامحتك على صدّك لاني أكرهه فرقاك
.... ويكفينا ألم ماضي جروح الماضي تاوي له
أحبك كثر ما حبي سكن في داخلك واشقاك
.... هواك أكبر من القول وقصيدي مع تفاصيله
حبيبي ماحدن غيرك ولايمكن حدن يسواك
.... غريبه كيف قانونك يـبـيع الحب ويزيله !!
من اروع الابيات
التي سمعتها
شكرا اخي الاستاذ
على النقل
تقبل مروووووري
سنفروووووووووور
(لعنبو من لامني)
العرض العادي
