يا السفاري لا أضلمت سود الليالي=شد حيلك والليالي سرمديه
توما جا لازمي ياهم لا الي= اضرب الميدان وعزومك قويه
والله انك في مكان أغلا عيالي= وأن لك في القلب حب ومقدريه
ذاخرك في الوقت لا من ضاق بالي=لاطفشت وزادت همومي عليه
وأعتزيبك في اللوازم ياحلالي=لانواني في بعض الأحيان نية
وافتخربك في المشاوير الطوالي= واتنحربك تخاتيخ خليه
انصبي قفر من العربان خالي=في متاهات الديار الجرهديه
في ديار مايجيها الاتصالي=شوفها يسوي البنوك العالميه
ديرة لاعلها وبل الخيالي=من مزون هلت الماء عقربيه
جلسة فيها ولو اني لحالي=تشفي جروح بقلبي داخليه
وتبعد هموم مثل صم الجبالي=اثقل من طويق واثقل من طميه
هذي والله منوتي يابري حالي=سجة من قبل تاخذني المنيه
وابتعد بي عن غثا قيل وقالي=وعن ضجيج الهيلمه والعنجهيه
وعن زعل نفسي وزلات الموالي= والتفاخر والجهر بالعنصريه
والتخلف والجهل والانحلالي=والمهايط والتمادي في الخطيه
والتراخي والكسل والاتكالي=والتزاحم عند باب الأولويه
لاغرابه لو اعلنت الاعتزالي=وصرت في دنياي مجهول الهويه