بحثت عن هذه القصيده الجميله التي استشهد بها حمد السعيد ببرنامج شاعر المليون...
وقتا ممتعا مع هذه الرائعه
,,,,,,,,,,
الرجال طيور توصـف للحـرار= وكل طير فـي جناحينـه يـطيـر
وين طير يحتري لـه كـل جـار= ووين طير يذعره صوت الصفير
وين طير لا نهض شـق الستـار= وين طيـر مايصيـد إلا الشريـر
لو تقـول إن الشجاعـة بالطيـار= كان فضلنا القطا عن كـل طيـر
النداوي له علـى الفعـل اقتـدار= والحمامـة بالمحـارم تستـديـر
وإن جهلت الزين والجنس الدمـار= انشد اللي فـي معرفتهـن خبيـر
افتهـم منـي كـلام باختـصـار= فرق بين الصوف من سلك الحرير
وفرق بين الحب ونخـال الشـوار= أصلهن واحد لاشك الـذوق غيـر
ربعة الطيـب تزيـدك بانتصـار= ترفعك رفع العمـد بيـت نظيـر
والردي عرفه مثـل بيـت هيـار= تنقبـر فيهـا ويدفنـك الحفـيـر
حقة الطيب تجيـك مـن الفقـار= والردي يعطيك كرسـوع البعيـر
لاترابـع واحـد بالعهـد بــار= وإن وفا مرة فهـو خيـر كثيـر
التجـارب خلهـا لـك مستشـار= لاتبي غير التجارب لـك شويـر
لاتجـي مدخـل يدينـه بالخبـار= مالقى صيـدة لقـى داب ضريـر
وانت في نفسك عليك الـدور دار= لاتحسـب إنـك مخلـى يافقيـر
وقر العالـم وتلقـى لـك وقـار= وإن حقَرت حقِرت لو إنك أميـر
والشرف لايستـوي فيـه انهيـار= الشرف هو مقضب السيف الشطير
والقناعة مرجلة والضعـف عـار= واطلب النجدة من الوالـي القديـر
لاتجـي للنـاس طلباتـك كثـار= كـل ديـوان تجـي يمـه مغيـر
ماخبرنا في هـل الشحـذة تجـار= غير فقره كـل نفـسٍ لـه تعيـر
خل عز النفـس للعـورة ستـار= لو فراشك في طرف بيتك حصير
وانت للعـودة مـن الله بانتظـار= واحـد مالـه وكيـل ولا مديـر
مـدة الله تمتلـي منهـا النـقـار= تجعل الغـدران بالملـزم تحيـر
تجعل الوادي مريـف بالخضـار= عقب ماهو يابس قشعـة هشيـر
الكريم معـان والفـارس مجـار= مدي الواجـب ونطـاح الذخيـر
والغنـى بالـذل مافيـه اشتهـار= والفقـر بالعـز لأمجـادك يثيـر
منزلك بالذل فـوق أعلـى منـار= ينتفضل عنـه مسكـان الحجيـر
مرقدك بالعز فـي حـزم القـرار= ينتفضـل بالمعـزة عـن سريـر
الغنى بالنفـس ماهـو بالصـرار= كم غنـي كـن ماعنـده دخيـر
كم فقير في ثقيـل الحمـل ثـار= وكم غني سمعتـه سمعـة فقيـر
لا تقول فلان يملـك لـه عقـار= ليش أنا ما أدركت مثلـه وأصيـر
واحد معطي ماهـو فيـك غـار= لاتجي لأحـوال خلـق الله نظيـر
ولاتقول الوقت لايحنـي صطـار= ضربة خلـت دماغـي يستديـر
غيرك الدنيـا تلوحـه بالحجـار= لين صار الدم مـن خـده خريـر
ضامـت الدنيـا مدللـة البـكـار= نازلين القفـر لـو جاهـم نذيـر
وانكشف برق مثل لـون الشعـار= يذكر الغزاي به عشـب وغديـر
جلعوا لـه مالهـم غيـره مـزار= في جهـام كنـه الصيـد المذيـر
وإن مشورك بالسلف والنشر سار= زمـة الحيـران زاهيهـا النشيـر
حاسبـيـن للجـهـاد وللمـغـار= والبنـادق ماتخـبـى بالجفـيـر
كان شاط الهوش شيطات العشـار= جتـك أواليـد تعـزوا بالفطيـر
موتة عن قولـة الخفـرات نـار= العـذارى ماتعشـق اللـي ينيـر
وينهـم هالحيـن مامنهـم سمـار= ماتشوف إلهـم ورود ولاصديـر
مالـت الدنيـا عليهـم بانكسـار= عقب مايضهد دبشهـم كـل بيـر
عقب شرب الدر من سور الحوار= هاجروا بالمدن يشرون العصيـر
والدبور إليا طبـخ قـدره وفـار= ذوب اللي فيه من حامي السعيـر
لـذة الدنيـا مثـل لعـب القمـار= لو جمعت المال شف تالي المصير
لوجمعت من الذهب حمل القطـار= عند نزع الروح ما أنتب له دبيـر
صار بين الوارثيـن بـلا مشـار= انعزل حق الكبير مـن الصغيـر
وانت حقك خامـةٍ عشريـن وار= حقتـك هـذي ولا فيهـا خشيـر
فصلوا منهـا حزامـك والـوزار= وأقرشوا بك يم مثـواك الأخيـر
وانسدحت من الفضا في وسط غار= يطـردك منكـر وقدامـك نكيـر
واهني اللي مشى طلـق الشكـار= سالم من ظلم عمرو ومن عميـر
لـوه بالدنيـا بحـالات خـطـار= يرتجي بالآخـرة فرحـة نظيـر
مـن رحمـه الله وقبلـن العـذار= رحمة الله تغفر الذنـب الخطيـر
والأثيم من الصراط أقرش وعـار= إن سلم من ويل طـاح بزمهريـر
يـا إلهـي كـان مالـي إقتـدار= ألتجي في رحمتك وأنت المجيـر
الشباب أقفى وأنـا بآخـر نهـار=وأرتجي فزعتك يانعـم النصيـر
,,,,
الشاعر مرشد بن سعد البذال الرشيدي
مرشد البذالي
العرض العادي
