يقال انه في يوم من الايام كان الشاعر الكبير بندر بن سرور مسجون مع سجينٍ اخر واتى عائله لزياره زميله السجين وكان بينهم طفله تدعى ريم وعندما ما شافها بندر بكى فاخذت البنت ريم تنادى لوالدتها وتقول -يمه الرجل يبكي وهذا ماقال بندر
أبكي وعيني تسهر الليل ياريم =مدري بلاها الشوق والا الظليمه
ياريم دمع العين مدري على الريم = والا على قلب تواكل صميمه
تقول لاطمني على نونها سيم =أبكي وعندي لازرق الدمع قيمه
يمكن يكون الدمع للعين تكريم = ويمكن يكون الها عذاب وحريمه
والله يلولا دمعةٍ كنها الديم =راحت ضلوعي من عذابي حطيمه
ودام البكا ياريم مافيه تحريم =ياعنك والله مارخص الدمع شيمه
أبكي على حالي من الوجد واهيم = لين الزمن يخلف عليه نسيمه
وأبكي حياتن صافيه مابها غيم =وين المحبه والقلوب السليمه
وابكي قهر وابكي من الغبن والضيم =وابكي من طعونٍ بقلبي قديمه
غدر الزمن خلا بوجهي مراسيم = مايذبح الرجال مثل الهزيمه
بعض المصايب شرها ياكل الهيم =وشلون بكبود الرجال الكريمه
وبعض المصايب يخلفن المفاهيم =وتبغى على ماقيل صبر وعزيمه
مظلوم بالدنيا وغيري مظاليم = من جيز ناسٍ لبسوهم جريمه
معاد ابي من سود الايام تعليم =عقب العذاب اللي كلاني جحيمه
ولو تصفي الدنيا علي الملازيم =معاد أدور من وراها غيمه
قصه وقصيده
العرض العادي
