محاورة بين :
سالم بن حويسه وعبدالله المشعلي
بتاريخ ( 28/4/1431ه ) ـ
=سالم بن حويسه
عد ما لا براق يبشر قدومه=يا سلامي عليكم حسب نهج الشريعه
يا عبدالله لقيت إبليس غارق بنومه=قلت وش ذا السوايا يا خبيث الطبيعه
=عبد الله المشعلي
مرحبا بالعميل اللي تجينا علومه= لوانا بالرياض وهو بحد الواديعه
اتركه دام نايم طول ليله ويومه =أنت لو تنشده ضيّق عليك الوسيعه
=سالم بن حويسه
السدود محفوظه والقلوب معصومه = كل واحد يقدم حسب ما يستطيعه
لا تبرا وريمه بالخطام مخطومه = من تبرا دعينا له بحبل القطيعه
=عبدالله المشعلي
دام عمك جمل ولا توانت عزومه = أنت أبو ما بغيت الا الجهل ما نطيعه
يا ابيض الوجه من جا نا قضينا لزومه = والحفاير وعدنا الصبح ولا تبيعه
=سالم بن حويسه
لا تلوم ابن عمك فالزمن لا تلومه = صابر والزمان الشين ما به نفيعه
المحارب تحرى حرب فرسه ورمه =لا توسط بصيفه قال يمكن ربيعه
=عبدالله المشعلي
ما نلوم العرب معطاه ولا محرومه=المهم العرب ما يخلفون الطبيعه
كل من يعترض حر الزمان وسمومه = أن وصل غايته ولا خذا له ذريعه
=سالم بن حويسه
نعرف ان اسما بالليل تسمر نجومه = والعرب تذرع خطوط البلاد السريعه
علم اللي يشب النار داخل هدومه = لا يطرف يمينه للسباع المجيعه
=عبدالله المشعلي
حالم الليل لا قمنا نفسر حلومه = أصبح العلم بين الناس كل يذيعه
ما حد يعترض له قوم ما هيب بقومه = وأنت مدري معى تميم والا ربعيه
=سالم بن حويسه
البلاد معروفه والشعوب محكومه = خل راسك تحت حكم الحصون المنيعه
الذهب ما قليل المال يقدر يسومه = وحافي الرجل لا يامن شرور النقيعه
=عبدالله المشعلي
البلاد معروفه والحيا اتبع وسومه = وأنت مثل الوحش في فراس عيطا رفيعه
وان شرينا وبعنا فالأمور محسومه = ما كسبنا المكاسب بالمكر والخديعه
=سالم بن حويسه
القضا جاك ما تقدر تدافع سهومه = والمخاطر علاج أهل العقول الصديعه
أمرحوا في سدير وتحت سدره ودومه = ومن يغير طريق الزمل نلعن صنيعه
=عبدالله المشعلي
الكحيلي نعرفه لو يشمر كمومه = ما قدر ينطح الغاره ولا سد ريعه
لا أنت خصمي ولا بيني وبينك خصومه = وعند راع الوداعه ما تضيع الوديعه
=سالم بن حويسه
ليه يا طير يا اللي ضيع الطقس حومه = الكحيلي يبارز بسيوف البتيعه
الثقه في بعض الأشخاص والله معدومه = وانت صت المهاة الجافل المستصيعصه
=عبدالله المشعلي
أرقب اللي تحرّى كل يومٍ قدومه=هذا رد البراء وأرزاق ربي وزيعه
حن شتانا بنجد وصيفنا في تنومه=صيدةٍ أتقفّاها والأخرى صريعه