[
يامؤمن الريفي انا جيتك زبون = جيتك على مدح اكثر الناس واعنيت
جيت وتعالى الله عما يشركون = ولولاه يامؤمن لطبك ما اهتديت
راضي بحكم الله عليمه مايكون = عالج عيوني لو بعد طبك عميت
ودي اخاشر فالبصر من يبصرون =واشوف دربي لاسرحت ولاضويت
والى قنصت اثبت مع اللي يثبتون = واشوف طيري كلما اوميت ودعيت
ياكثر مايضرب خويي الطبلون = من كثر ماكلته مطبات وكليت
وودي اشوف اللي علي يعرضون = وبعض الليالي ودي اسري دون ليت
واشوف ناس فالقفا مايرحمون = اما وقفت لصاحبي ولا مشيت
من دون نضاره ولاهم يحزنون = ياكثر ماكسرت كشمات وشريت
لكن يادكتور جعلك ماتهون = ابغيك كلمة راس دامك مابديت
اسمع ولا ابغي اللي وذانك يسمعون = ربي كتب يكشف لك اسراري وجيت
صورة عديل الروح عندك فالعيون = واخاف تقطعها بموسك ماوعيت
ولاعليك امر اطوها تحت الجفون = وعقبه لو تقطع عيوني ماشكيت
هي راس مالي والعرب مايدركون = اني على بابا الممات وماحكيت
ياقو قلبي يوم قفن الطعون = اللي على ذاك الموادع مابكيت
وياصبر صبري والعواذل يحسبون = اني ذلهت من الهوى ولا سليت
اسكت عساهم من سكاتي يسكتون = وانا عن اللي في ضميري ما انتهيت
وادور فرحة مع اللي يسهرون = ان ذكروني اخت فنجال وسريت
اخذت من وقتك يادكتور العيون = عالج عيوني لو بعد طبك عميت
واستر علي واللي معك لايفطنون = انت الوحيد اللي بعد ربي دريت
يامؤمن الريفي _ ابن فطيس
العرض الشجري
