"وصية عبدالله المشعلي لأبنه محمد "
يا الله يا اللي كلنا منك واليك=من يوم تخلقنا إلى يوم نلقاك
والخلق كله لك عبيد مماليك=الملك ملكك والبرايا براياك
والكون واللي فيه في قبضة أيديك=واللي تحوش أيديننا من عطاياك
يا الواحد اللي كل حي يناجيك=اللي ليا ضاقت على العبد ناجاك
انت القريب اللي مجيب لداعيك=مستبشرين في مناجاك ودعاك
وانت العظيم اللي نخافك ونرجيك=رجوى منيب تايب يطلب أرضاك
وانت الكريم اللي عظيم الرجاء فيك=تمدنا من فضل جودك وحسناك
وانت العليم اللي ما شيٍ بخافيك=واللي بعلمك قاصرٍ عنه الإدراك
سبحانك الله في صفاتك واساميك=متفردٍ بأسمى صفاتك وبأسماك
فردٍ صمد مالك حليٍ يحاليك= ولا شريك لك ولا نعبد سواك
من عقب ذا .. يا ( محمد ) الله يعافيك=انا على ما قيل بأمرك وانهاك
وصى ( الشريف ابنه ) وانا اليوم باوصيك=واسمع وصاة ابوك يوم انه وصاك
ما قلتها لك غير يوم أني اغليك=وصيةٍ تصلح لمثلك وشرواك
افطن لها و وثقّ مع الله عراويك=واحرص على ما ينفعك عند مولاك
امور دينك عن سواها تكفيك=والا الامور الباقيه جعلها فداك
تمسك بدينك ودنياك تاتيك=وتفوز بالثنتين دينك ودنياك
واجعل من أعمالك بهذي لهذيك=ما تزرع بدنياك تجنيه باخراك
وامش بطريق الخير والله يقويك=واغنم شباب العمر قبل يتعداك
ترى العمر له حد والموت قافيك=والوقت كثر اللي خذا منك ما اعطاك
واحذر تطيع اللي يغرك ويغويك=يغويك عن دربك ويخلف نواياك
ترى الهوى والنفس وإبليس ترميك=للهاويه وان طعتها تقطع ارشاك
واليا رمت بك للخطر والتهاليك= تلقا المشاكل في طريقك تحراك
وتكثر مساريحك وتكثر مساريك=يا بعد مسراحك ويا بعد مسراك
اما تروح ومردي الحظ يرديك=وإلا تعوّد ناقل داك برداك
ولا عاد تلقا لك طبيبٍ يداويك=الا الذي بيده مشافاك ودواك
ربك هو القادر إذا راد ينجيك=فتح على قلبك وعافاك وانجاك
واعلم ترى ماشٍ عن الله يغنيك=ولو كثر مالك عن الله ما اغناك
واصبر على المقسوم من عند واليك =الرزق عند الله وما كتب لك جاك
تجي بك الأيام والا توديك=ما لك عن اللي يكتب الله فكاك
فانكان لك فكر وعقل يقديك=اختر طريقك من قبل تمشي خطاك
اما تجي ذيب ونابك يعشيك=والا ترى شهب الذيابه تعشاك
واعرف ترى الواقع يضيع مروايك=ما تعرف اصحابك ولا تعرف اعداك
والناس تاخذ بالمصالح وتعطيك=كلٍ على مبدا تعامله وياك
ان كثر مالك كثروا اللي حواليك=كل يداري خاطرك ويتدراك
واكبر منافق يتبعك من حواشيك=يمدحك في وجهك وعينه لمخباك
وان قل مالك ما احد يلتفت فيك=كل يعديك النظر ويتحاشاك
واللي خوي لك يروح ويخليك=لا خليت ايدينك تخلى وخلاك
ويصر ما له رابط يربطه فيك=حتى ولو انه من ادنى دناياك
فاحذر تصافي واحد ما يصافيك=ما كل من حولك صفا لك وصافاك
وجرب ترى كثر التجارب تربيك=تظهر لك عيوبك وتظهر مزاياك
انشد مجرب عن تجاربه يفتيك=واخذ الفوايد منه لامنه أفتاك
وانا على ما صار عن حالي انبك=عسى الذي جاني من الوقت ما جاك
من صغر سني عيشتي في تضانيك=تصفق بي الدنيا من هناك لاهناك
وقت مضى عن وضعنا ويش يدريك=كله صراع وزوبعة هم وإرباك
الوقت قاسي والليالي محاليك=واحداثها تنسج شرابيك واشراك
عشنا بها ما عاشوا بها الصعاليك=حياتنا ما هي رفاه وتفرناك
ابيوتنا ( طلحٍ ) غصونه مشاويك=في وادي بين ( الوجيد وجبل راك )
وطعامنا ( تمر ) من غروسنا ذيك=معا ( حليب ) العرب حسكات الاوراك
وشرابنا من ( جم ) نبع المصاميك=مطوية الجيلان رصاتها سماك
وناخذ من ( عروق النوامي ) مساويك=( عروق راك ) منبته وادي الراك
وسلاحنا ( مضلعات ) البلاجيك=رصاصها روسه مثل روس الأشواك
و( سٌبك الحديد ) اللي يسبكها سوابيك= خناجر من صنعة الحف هذاك
وفازوا بها اللي يدركون المداريك=اللي غدوا بالمدن والريف ملاك
من عادها ايام الحجر والدواميك=قبل الصكوك وقبل توثيق الأملاك
واليوم شافت عينك وسمعت اذنيك=راحت علينا بين هذا وهذاك
وحنا ما نملك لا عقارٍ ولا شيك=ما نملك الا عزة النفس وعفاك
عبدالله المشعلي
وصية
العرض الشجري
