"سامحوني يا هل البيت" - قصيدة عبدالله بن فرج ورد فلاح بن فالح

[الكاسر]

بسم الله الرحمن الرحيم
السلام عليكم ورحمة الله وبركاته

قصيدة قالها عبدالله بن فرج بن علي المساردة حينما نوم في المستشفى في الرياض نسأل الله له الشفاء والعافية
ورد عليه فلاح بن فالح بن ثلاب المساردة


يقول بن فرج:

سامحوني يا هل البيت والظلّ الظليل=والله إن كنِّي بسجنٍ حلقه مدهّمات
ودّي أسافر لجاشٍ لعله جاه سيل=عقب ما مرّه سنينٍ شدادٍ ممحلات
وأهل جاش الي تحط الشحم وأذناب حيل=يكرمون الضيف لا جا الليالي المعضلات
فوق فكسارٍ جديد يحنّ من الثقيل=سايقه هندوس غدرا الليالي المظلمات
لا نزلت بحزم جاش وجا وقت الرّحيل=ودِّي أنزل منزلٍ عاشقه قبل الممات
مرحبا بالموت لا جيت جاش يالهبيل=مثل ما رحَّب مناحي بضيفانٍ غلات

يقول بن فالح:

قال من عدّى عصيرٍ بمرقابٍ طويل=ضايقٍ صدره وعدّا بروس النايفات
هاضني قافٍ سمعته من الوزن الثقيل=صاغه الشاعر من الفكر صوغ مجوهرات
قاله بقِسم العناية وهو فيها نزيل=يوم ضاق الصدر والعين عيّت لا تبات
مسهرينه مرْ بإبرة ومرٍّ بِاتْحَليل=وإن شكا حرّ المرض زوّدوه مهدِّيات
ألتهم داره وربعه وخانه ضعف حيل=ساهرٍ مابين مرضى وبين ممرضات
يالله يالّي تْخَلق الناس جيلٍ بعد جيل=يا إله الكون عالم جميع الكائنات
رد عبدالله لنا سالمْ وحاله جميل=يرفل بثوب السعد والشدايد زايلات
رفقتك يا بو دغش ما نبي فيها بديل=يا صليب الراي يالّي علومك غانمات
والفرج قريب ما هو على الله مستحيل=ترجع لجاشٍ وتسعد سنينٍ مقبلات
والله لو إن صحتك بالمال يا زبن الدخيل=إن نسوق المال ونستدين مضاربات
لكن هذا حكم ربي ولا لله مثيل=العظيم الّي له أحسن الأسامي والصفات
غير خذ مني نصيحة توضَّح بالدليل=داوم الأذكار وأبشر من الله بالثبات
خلّ ذكر الله جليسك وأنيسك يا عميل=ومن ذِكَر ربه يعينه مجيب الدعوات
وإحمد المولى وسبّح مع زود اتْهَليل=وإعلم إن هذي هي الباقيات الصالحات
دايما خل إتكالك على الرب الجليل=الذي يعطي ويمنع عليم الخافيات
حيث لا يقدر زميل ولا يقدر عميل=ينفع المخلوق وأحكام ربي نافذات
والختم مني سلامٍ عدد وبل المخيل=للنبي المصطفى أزكى سلامي والصلاة

والسلام عليكم ورحمة الله وبركاته

[مسعود فهد المسردي]

الكاسر / شكرا لك وصح لسان الشاعرين أسأل المولى عز وجل أن يشفي أبودغش وكل مسلم ولاشك أنه من الرجال المعدودين أطال الله في عمره وعمر أبوحمد ولك أجمل تحيه وتقدير

[الذيب2010]

اجمل تحية ارسلها اليك اخوي الكاسر واللة يشفي ابو دغش ويعطية العافية وصح اللة لسان الشاعرين ومال الثقيل الا الثقيل فابو دغش شاعر غير عادي اللة يشفية والشاعر فلاح بن فالح شاعر قبيلة المساردة وكلنا نفتخر فية سواء رد او ما رد واخيرا تقبل تحيات اخوك الذيب

[راشد بن فلاح]

نسأل الله العلي القدير أن يمن على ابو دغش بالصحة والعافية .. كما ان موقف ابو حمد موقف اخوي غير مستغرب من رجل بشهامة ابو حمد فالمواقف الاخوية تتجلى دائماً وترتبط حال ذكرنا لهذا الرجل .. ومثل هذه المواقف غير مستغربه من ابناء المساردة فهم دائماً من يجسدون معنى الأخوة ..


الكاسر .. متألق دائماً في رصدك ونشرك للمواضيع المميزة ..

[اميرالمشاعر]

مشكوراخوي الكاسر على هذه القصائد التي تحمل معاني حب شيبانا لموطنهم وحبهم لبعض الذي يكاد يتلاشى في هذا الجيل الجديد
شفى الله ابودغش صاحب المجلس العامر بعطران الشوارب وراعي الوقفات وبيض الله وجه ابوحمد على هذا الرد الوافي فلا يستغرب من هذا الشخص المشاعر الصادقه..تقبل مروري

[دامح الزلة]

اخي الكاسر بيض الله وجهك على نقل هذة القصايد ابو دغش يستاهل كل خير وهو رجال محسوب على القبيلة نطلب من الله الشفاء لة ابو حمد شاعر ماهو مستغرب علية الرد والشفقة على رفيقة شـكــ وبارك الله فيك ـــرا لك ... لك مني أجمل تحية .

[خط القدر]

صح لسان الشعار

والله يقومه بالسلامه ابن فرج

اخوي الكاسر الله يعطيك العافيه

[أبو فـلاح]

الله يقوم أبو دغش بالسلامة ويعيده إلى داره وربعه وهو يرفل بثوب الصحة والعافية ..

وصح لسان الرجل الشاعر العابد أبو حمد ...

[خالد بن معدي]

نسأل الله العلي العظيم رب العرش العظيم ان يشفي ابو دغش وان يلبسه ثوب الصحة والعافية وان يجعل ما اصابه تخفيفاً من ذنوبه آمين يارب العالمين ومما لا شك فيه انه من الرجال الذين لهم وزنهم بين القبيلة وعند الأجناب
ولا نبخل بدعائنا للشيخ فلاح بن فالح اطال الله عمره وامده بالصحة والعافيه ويعلم الله ان لكليهما كامل المعزة والتقدير الخاصة في قلبي وانا اقول هذا وهذا مايجب ان يكون فيلزم علينا جميعاً احترام كبار السن الذين لسنا بشيء بدونهم ولو لا حظتم ان ابو دغش عندما اصابه المرض وثقل عليه لم يتذكر اي مكان سوى ديرته بين ربعه وجماعته
و لو نرجع لقصيدة ابو دغش للقينا فيها من العبر والحكم ما ليس بالقليل ومنها الإعتذار وحبه لداره ومدحها لها ولإهلها ورغبته حتى بالموت فيها هذا دليل على محبة شيابنا لبعضهم البعض ولديارهم وهو مايجب ان يكون بيننا ومنا نحن الشباب ونمشي على خطاهم
في الأخير آسف على الإطالهولكن هذا ما استطعت ان اكتب ولا الخاطر مليان بس ما عرفت اعبر يمكن مره ثانيه انشاء الله

[زمان يافن]

الله يشفي عبدالله بن فرج