((أهل الحـــــداثــــــة))
أشوف لي ناسن تسمى شواعير = تطرد ورى الشهرة بأية وسيلة
خبلان تلحقهم صفوف وطوابير = لكحكحوا صاحت صفوفن مهيلة
جمهورهم حلو البنات الغنادير = اللي تمايل كلما جات شيلة
إتشوفهم جلاًس بين الجماهير = إيهيضون اللي طراله خليله
وجمهورهم ناسن تحط المناكير = شبه الرجال ومايجون الطويلة
والشعر ينخاني وينخى المناعير = اللي تعرف الشعر وأهل الجزيلة
ياأهل الحداثة إسمعو للتحاذير = لاتقربون الشعر ياأهل الهزيلة
أنا بحذركم ولا به معاذير = أنتو كما اللي يطلب المستحيلة
حنا حماة الشعر وأهل المشاوير = حنا لها والصعب لازم نجيله
الشعر لا قلناه مثل الدنانير = وأنتو مهبل تطردون الهبيلة
حنا ذيابة في الليالي المعاسير = وأنتو سواة اللي رقد في المسيلة
ياعزتي للي سعى للمخاسير = يشجع الخبلان ماهو دليلة
وختامها ياالله بزين المقادير = وتشفي عبادن في الضماير عليلة
الشاعر / فايز بن سالم ابوزوير المسردي