الأ يا بن آدم ويش يقنعك من دنياك=وربي عطاك من الكرامات ما يكفيك
تكفـّل برزقك واعتنى بك ولا خلاك=ويسر جميع أمورك وكل ما يعنيك
ولا قنعت لو من كل شي تبيه أعطاك=لا شي ملا عينك ولا واقعك يرضيك
يسوقك هوى نفسك من الباب للشباك=وكثر الأماني لا تميتك ولا تحييك
ترى الله عطاك العقل والعلم والإدراك= ولا بده يصيبك نصيبك ولا يخطيك
لا تجزع ولا تفزع ولا يختلف ممشاك=لأن القدر كثر الحذر منه ما ينجيك
ما غير الله اللي يلطف بحالك ويرعاك=اليا ضاقت الدنيا عليك ولحق ماديك
فرجها اليا ضاقت افرجها على مولاك=عليه الفرج والرزق بيده ما هو بيديك
عظيم الرجاء رب السماء مالك الأملاك=توكل عليه وكل ما كتب لك بيجيك
ولا ترتجي مدات هذا ولا هذاك=ما دام الرجاء في واحد مدته تغنيك
ولا تامن بدنياك وتجيبك من أقصاك=وترجع تمجد حاضرك من فعل ماضيك
يا كثر العبر يا غافل القلب ويش أدراك=والأيام عن توقيت الأحداث ما تنبيك
أنا من سبا جبت النبأ و العلوم عفاك=خذ العلم من مبداه والحق على باقيك
مشينا على الرمضى وطينا على الأشواك=وشفنا حقيقة واقـع مـا بهـا تشكيـك
على غير ما نختار دارت بنا الأفلاك=ورحنا وجينا في عربات تلفريك
عادات وتقاليد ومفاهيم ما تخفاك=نأول عليها الكر والفر والتكتيك
ولا باقي لك غير ما قدمت يمناك=عند اللي بعيد عنك والا اللي مواليك
وقدرك مع الأصحاب قدر اللي بمخباك=إذا صار عندك شيك تسوى رصيد الشك
يا كم و احد لما قضى لازمه ينساك=ولا يذكرك لا صار ما له لزوم فيك
تحسبه على ظنك وهو ما هو بوياك=لاجل حاجتك باعك لاجل حاجته يشريك
ردي المبادي لو تصافيه ما صافاك=ولا تشوف منه الطيّبه لو يبيض الديك
لا شافك تشبرق لك ولا منك رحت أهناك=تقفـّـاك باللي كنها طلقة البلجيك
عبدالله المشعلي
عربات تلفريك
العرض العادي
