مرت شهور الحول ما زرت مخلوق = اراجع أحداث مضت وقعها طال
مابين سجة حزن وهموم وحقوق = غابت معاني فرحة الحال بالمال
مرات تأخذني على كل طاروق = وبيت القصيده من جزيلات الأمثال
ومرات تسريبي على رمل وعروق = فيها النجوم الساطعه تشعل إشعال
ومرات أخايل في السما غيم وبروق = وأسبح بحمد الولي عز و إجلال
وحدي ولا خوة رديٍ و مطفوق = في خلوةٍ تغني عن القيل والقال
تالي مخاو اللاش في خوته بوق = ناكر معاريف النشاما و الأبطال
كم واحداً لا شافني كنه مصفوق = أمحق وجيهٍ قدرها قرش وريال
ناكر جميل الناس ياعله العوق = واللي سواته يبشر بفقر وإذلال
ولا النشاما قدرها دايم فوق = ما نزلت من قدر الاشناب مثقال
حتيش لو منصبه بين ومرموق = ما كل من جاب الشهادات رجال
الطيب واضح ما يبي شرح وفروق = فعلٍ يخلد بالزمن مضرب أمثال