إن جيت ياخاطر عسى الله يحييك=على الشحم ومبهرات الدلالي
عند الرفيق اللي يعزّك ويغليك=حيثك ولد عودٍ عزيزٍ وغالي
وإن رحت ياخاطر فلا عندنا فيك=تغيب عنّا شهور ولاّ ليالي
خذها على الذرعان منّي وانا اخيك=الكذب ماهو من سمات الرجالي
لاراجي غيرك ولاني براجيك=وفي كل ميراد طوال حبالي
افتل واحل معقدات الشرابيك=واشيل ماشالت ظهور الجمالي
ياما تصعلكنا وصرنا صعاليك=وياما تحمّلنا الحمول الثقالي
للمرجلة صرنا عبيدٍ مماليك=وكفوفنا تندى من أول وتالي
لو كان مانملك رصيد على شيك=وجيهنا عند النشامى طوالي
نشوم عن هذي ونلهي على ذيك=وماحاشت ايدينا ماهو راس مالي