سامحوني يا هل البيت والظلّ الظليل=والله إن كنِّي بسجنٍ حلقه مدهّمات
ودّي أسافر لجاشٍ لعله جاه سيل=عقب ما مرّه سنينٍ شدادٍ ممحلات
وأهل جاش الي تحط الشحم وأذناب حيل=يكرمون الضيف لا جا الليالي المعضلات
فوق فكسارٍ جديد يحنّ من الثقيل=سايقه هندوس غدرا الليالي المظلمات
لا نزلت بحزم جاش وجا وقت الرّحيل=ودِّي أنزل منزلٍ عاشقه قبل الممات
مرحبا بالموت لا جيت جاش يالهبيل=مثل ما رحَّب مناحي بضيفانٍ غلات

قال من عدّى عصيرٍ بمرقابٍ طويل=ضايقٍ صدره وعدّا بروس النايفات
هاضني قافٍ سمعته من الوزن الثقيل=صاغه الشاعر من الفكر صوغ مجوهرات
قاله بقِسم العناية وهو فيها نزيل=يوم ضاق الصدر والعين عيّت لا تبات
مسهرينه مرْ بإبرة ومرٍّ بِاتْحَليل=وإن شكا حرّ المرض زوّدوه مهدِّيات
ألتهم داره وربعه وخانه ضعف حيل=ساهرٍ مابين مرضى وبين ممرضات
يالله يالّي تْخَلق الناس جيلٍ بعد جيل=يا إله الكون عالم جميع الكائنات
رد عبدالله لنا سالمْ وحاله جميل=يرفل بثوب السعد والشدايد زايلات
رفقتك يا بو دغش ما نبي فيها بديل=يا صليب الراي يالّي علومك غانمات
والفرج قريب ما هو على الله مستحيل=ترجع لجاشٍ وتسعد سنينٍ مقبلات
والله لو إن صحتك بالمال يا زبن الدخيل=إن نسوق المال ونستدين مضاربات
لكن هذا حكم ربي ولا لله مثيل=العظيم الّي له أحسن الأسامي والصفات
غير خذ مني نصيحة توضَّح بالدليل=داوم الأذكار وأبشر من الله بالثبات
خلّ ذكر الله جليسك وأنيسك يا عميل=ومن ذِكَر ربه يعينه مجيب الدعوات
وإحمد المولى وسبّح مع زود اتْهَليل=وإعلم إن هذي هي الباقيات الصالحات
دايما خل إتكالك على الرب الجليل=الذي يعطي ويمنع عليم الخافيات
حيث لا يقدر زميل ولا يقدر عميل=ينفع المخلوق وأحكام ربي نافذات
والختم مني سلامٍ عدد وبل المخيل=للنبي المصطفى أزكى سلامي والصلاة