قالوا لي أقصد في فلان قصايد=ثم امدحه يعطيك موتر مكافاه
قلت أمدحه وشلون والمدح كايد=ما يمدح إلا الي طروقه مخلاه
"فلان" لا ينقص ولا هو بزايد=والمدح ما هو له ولا هو بوياه
المدح للي يرتكي للشدايد=المدح لحمود الجهيمي وشرواه
والشيخ إبن شفلوت مقدم عبايد=مترك هو الي ترفع الراس طرياه
وإلا إبن سمرانٍ صدوق الوعايد=معجب محمد جعل الأنذال تفداه
وإبن شبيب القرم دسم الموايد=مناحي الي تذبح الحيل يمناه
وإلا ولد فالح حمد من يكايد=ويقاوي العسر بزمانه مقاواه
أمدح حمد حيث إن لفعله شهايد=ماهوب لأجل إني من أقر ب دناياه
وإلا إبن خربوشٍ ولا هو بعايد=راجح عسى الجنة مقره ومثواه
شيخ علينا من كبار الفقايد=يا كبر فرجة راجح اليوم كبراه
والأجواد واجد ما عليهم زوايد=لكن نعد الي سمعنا وشفناه
ذولا الحلاحيل الزحول التنايد=ذولا الأسود أبنا الأسود المضراه
ذولا الذي والله تجوز النشايد=فيهم وكلٍ منهم المدح يزهاه
ولا الردي لو مدح ما هو بفايد=والمدح ما هو داري ويش معناه
حي القروم أما الرخوم الفسايد=ما للرخوم وجيه عندي ولا جاه