مل قلب هزه الهم والهــــــــاجوس هـــــز = وارتجف عرشه وزلزل وجا فيه اهتزاز
عقب ثلثين من الليل فز القــــــلب فـــــــز = مثل فزة واحد واطي كسرة قزاز
كن بأقصى ضامري ياجمـــاعه نار قـــز = والضلوع يلوعها مثل ضو البوتقاز
وكن فــوادي من عـراويه بأمواس يحـــز = من همومي والهواجيس في صدري حزاز
عقب ذا يـــاراكب اللي على الغـــايه برز = جمس شكمانين توه جديد آخر طراز
يعجب الســـواق لي ما عطـــا حزم الجرز = وأن تحرك يقرب البعد ويشق الغراز
من ديار البــعد قلب العــنا صـــابه قـلـــز = ومن ديار البعد عز الله ان القلب جاز
الغدا لي ســـــــــهل الله بدايات المــــلـــز = ثم يشيك من محطات موقفة الحجاز
وغادر الديره مع العصر يوم انه جهــــــز = وأنتله مرفوع بالوصف كنه أريل جهاز
والعشا حول الســليل مع المغرب نجــــز = حايفه غمر شقردي وعادته النجاز
ثم تحرك والدريول يــلــز الرجــــل لـــــز = طول ليله راح كله مساقط واجتياز
والونيت يشـجــع اللـــــي يحبـــون اللزز = لو يقحص ويل طلع من القاع ارتواز
كنه السكران لي غزه الشــــيطان غــــز = عقب ماأفلا غرشتين وطاب له الخناز
ينطنخ ويشوش ومن المخــاطر ما يكــــز = شايف بعض العرب كنهم عنده عفاز
لا أشرقت شمس الضحى لي الونيت بكل عز = واقف في وسط ديرة بني عم عزاز