سلامي على صقر ليا راح جاب الصيد=ماهو طير بن برمان متهدف الحيه
نبي ياعميلي نجعل الحيد فوق الحيد=والاسرار عندك يابن هرسان مخفيه

هلا مرحبا ترحيبة ذياب لبوزيد =ولابه شقاء الا للعيون الشقاويه
على مخططاتك يطلع البني بالتحديد=عسى الله يوفقنا ويصلح لنا النيه

انا اشوف ناسٍ عيدوا قبل يوم العيد=يقولون كل ايامنا فطروضحيه
منول يجازون الحرامي بقطع الايد=وهذا الزمن نبتت يدين الحراميه

مثل ماتشوف الناس ملَت من التقييد=وصادف هواهم لانفتحات حريه
جميع المفاهيم القديمه على التجديد=ويكفيك عن كل التواصيف ماريه

لقينا على هداج تيما سعدوسعيد=ولقينا قحاطين ودواسر وياميه
لكن مادرينا وين الاصلي من التقليد=صورهم تشابه والعلامه تجاريه

تجف المشارب00 غير هداج ماه يزيد=وجم الرها ماينزفه كثرة ادليَه
وقصور المعرفه! نقص والا علامة جيد=نتيجة سواء للزايفه والحقيقيه

بغينا بعضهم يفزع اللنا وجاب العيد=ولقيناه ضايع بين هذي وهذيه
اشوفك نسيت اوصافهم وانت منت بعيد=تراهم يحبون البشوت الحساويه

من ادى الجهد حقه على الشكر والتمجيد=ولاخطا الوفق جنب مجاله وطاريه
وانا اعرفك عرف(ن)زين لاشفت غرة صيد=تسلط عليه اضواء القصيد ومواذيه

تراني بري ماجبت سيرة لعمر وزيد=وانا عارف الحسنه وانا عارف السيه
ترى المشكله ماهو محمد لكن حميد=خذ العلم والتقييم ميه على ميه