يا الله يا مرسل تباشير وإنذار=يا اللي ما يخفى عنك مثقال ذره
تجعل لنا حظ مع الناس الأبرار=فان الحظيظ اللي بفضلك تبره
أنت الكريم المعطي النافع الضار=واللي تنوشه رحمتك ما تضره
من جرب الدنيا تجرعه الأمرار=وما مر شمطان النواصي يمره
نرتاح مر ونفقد الراحة أمرار=وتمرنا الأيام حلوه ومره
يوم بيوم وعادة الوقت دوار=,واللي ما يرضى الهون لله دره
يا الحاضر الغايب سلامات الأسفار=غيرك صواديف الليالي تفره
يكفيك موجز عن تفاصيل الأخبار=كل الوطن طفنا ببحره وبره
لا نخفي أسرار ولا نكشف أسرار=وعلومنا من سمع فيها تسره
عشنا بكرامتنا على الفطرة أحرار=وأقدامنا تمشي على الأرض حره
نتعب ونتعبها على كل مشوار=وحنا القدر نؤمن بخيره وشره
نصبر ولو تحدنا النار للغار=والصبر حكمه والجهالة مغره
ونربط علاقتنا مع كل مغوار=اللي دروب المرحلة ما تغره
نختار بعض أنفار عن جملة أنفار=اللي لهم بالطيب كره وفره
وان اختلفنا بالنوايا والأفكار=كل يعود ماه في مستقره
ما تستوي رفقة فقارا وتجار=خمسة كواكب ما تسعها مجره
واللي يبي يختار له حق يختار=أما يهد الحبل وألا يجره
وأنا ليا شان الوفق والدهر جار=ماني على ما قيل قصاص جره
يسوقني سوق الجمل دمي الحار=لا ونست في قلبي من الهم حره
ما تستر من أهل المشاريه الأعذار=والله ما يخفاه مثقال ذره

ابيات شعر خلتها مثل الامطار=مثل المطر رعده وبرقه وقطره
حقوق نو(ن) أمطرت جملة اشعار=تفيض المسايل والمحاني تطره
يصوغها اللي من طويلين الاعمار=المشعلي للــه ..للـــه.. دره
ودي معه نقرا ونكتب ونختار=ابيات شعر من قراها تسره
حيث ان له في قمة المجد مسمار=ثبت مكانه عقب كره و فره
يالمشعلي حركت في الصدر مخطار=يوم الكواكب ماتسعها مجره
وعجبت من وقت تغير علي وغار=مامنه خير وليتـــه يكف شره
وضاقت علي الدنيا بلا سابق انذار =وما فتح من باب علينا تزره
وقت تغير فيه فكري والافكار=الناس غير الناس مهما اتشره
الاخ والصاحب واقاربك و الجار=ماترتجي من مثل ذولا مبره
تحتار كيف تميز الناس تحتار=والمجتمع باسره تغير مقره

عشنا في الدنيا على الفطرة أحرار =وأقدامنا تمشي على الأرض حـره