المساعد الشخصي الرقمي

مشاهدة النسخة كاملة : بنو قحطان


عبدالله المشعلي
11 / 03 / 2009, 26 : 02 AM
بنو قحطان

يا الله يا والي تدابير الأكوان= يا عالم ما بالضماير يكنا
يا واحد بأمرك جرى كل ما كان= ومن العدم كونتنا لين كنا
يا اللي فرضت ألنا الفرائض والأركان= ومكنتنا بالدين حتى مكنا
خلقت خلقك وأنت للخلق عوّان= عنا على طاعتك يا رب عنا
يا رب ثبتنا وزدنا بالإيمان= أنت العظيم اللي بأمنك ومنا
رفعت سبع فوق من دون عمدان= وبسطت سبع فوقها تمتحنا
يا من لوجهك يسجد الإنس والجان= وعذبت من ضل وعصاك وتجنا
ألطف بعبدك قبل زوغات الأذهان= اللي بلذة عيشته ما تهنا
يحمل من أوزاره قناطير وأطنان= وقلبه بذكرك يامن ويطمئنا
واللي تخفيه المقابيل ما بان= وجسور آماله في خياله تبنا
كلٍ على دنياه يسعى على شان= سعادته والحظ لا شان شنا
واللي جمع دينه ودنياه ربحان= دينٍ ودنياً غيرها ما شحنا
وان قلت الحيلات في بعض الأحيان= حنا القريبين البعيدين حنا
حنا مع اللي يسكن الأرض سكان= وبعزومنا فوق الثريا سكنا
حنا العرب أصل العرب ( بنو قحطان )= صفوة عرب ( شبه الجزيرة ) وطنا
نجوبها ونقطن على كل مقطان= وقت الجهل كم منهلٍ به قطنا
عدلين للصاحب وللضد عوجان= بني " مظيم " مزبنين المجنا
يلقا بنا الخايف ملاذٍ ومزبان= ومن حدته سود الليالي زبنا
يوم السنين الماضيه خوف وأمان= عدونا ما يامن الخوف منا
نطمع ولا يطمع بنا كل طمعان=واللي طمعنا ناخذه مع ضعنا
حماية الساقه هل سنان وعنان= تنبي تواريخ أهل الأمجاد عنا
وسلومنا ورثٍ من أبا وجدان= نطيب من طيب أصلنا ومعدنا
(عشرٍ ) تميزنا بها بين الأقران=هي تقترن فينا وفيها اقترنا
مفاخرٍ نفخر بها سر وإعلان=ومن العصور الماضيه بقيت ألنا
( نطح المغيره ) لا رقص كل شيطان=بشلفا ورمح مثل رمح المطنا
و( فك النشب ) بين العرب لا بدأ الشان=بالصلح وان كبرت حملنا وشلنا
نبرك لحمل ما يشيله بليهان=ويهون بأمر الله وحنا ما هنا
و( الحق ) مقطاعه عوارف وشيخان=منا وفينا وسلمٍ يورخ ألنا
و( ترحيبنا ) ناموس شيبٍ وشبان=وابيوتنا على المراجل تبنا
و( الضيف ) يلقى له كرامه بسفطان= نكرمه لو فقر الليالي شطنا
و( قصيرنا ) نرفع مقامه ولا يهان= ما يحسه أدنى محسةٍ من جهنا
و( جويرنا ) يامن بنا وحقه يصان=اليا زبن فينا حفظنا وصنا
و( عانيّنا ) نعينه على مر الأزمان= يشهد لنا ماضي وحاضر زمنا
و( خوينا ) يرقى على راس ما بان= من وين ما تبين المواجيب بنا
و( نافي ) ليا منه غدر كل خوان= اليا عطينا العهد معاد خنا
لنا الوفاء والجود مبدأ وعنوان= نتعب من أجله دايم ونتعنا
وأقوالنا وأفعالنا خير برهان= واللي يراهنا ما ياخذ رهنا
ميزاننا يرجح على كل ميزان= ولا ختل ميزان الزمان اتزنا
ولا أقول في الرجاجيل نقصان=كل القبايل وصلوا اللي وصلنا
أرجال وافين ومشايخ وفرسان= كم من راعي منسف وسيف يسنا
إن كان من ( قحطان ) وان كان ( عدنان ) = نعتز فيه وعضونا من بدنا
من طاب فعله طاب والخد ميدان= لو انتمى الأوطان بعّد ودنـّا
اليوم " بدو .. وحضر " من فضل منان= صرنا سواء من شامنا لا يمنا

عبدالله المشعلي

حــظ عــيني
11 / 03 / 2009, 50 : 04 AM
لمشاهدة مشاركات هذا القسم يجب ان تكون مشاركاتك 10 أو أعلي. عد مشاركاتك حالياً 0 .

عايض بن معدي
11 / 03 / 2009, 02 : 09 AM
صح لساااااااااانك ياعبدالله
مبدعا كالعاااادة وقصيدة رائعة

تحيااتي لك

بطيحان بن ناصر بن هرسان
11 / 03 / 2009, 17 : 11 AM
رفعت سبع فوق من دون عمدان =========وبسطت سبع فوقها تمتحنا ((سبحانه ))


صح لسانك يالوافي انت كفو وقحطان يستاهلون ,,,

ناصر بن هذال
11 / 03 / 2009, 18 : 01 PM
صح لسانك قصيده قمه ولاهي غريبه منكــ
أعجبني تقديم الدين على الدنيا في هذا البيت:
واللـي جمـع دينـه ودنيـاه ربحـان
ديـنٍ ودنيـا غيرهـا مــا شحـنـا
,
شكرا لك على هذه الابيات واسمح لي انقل نسخه من القصيده الى منتدى مجالس قحطان.

محسن المسردي
11 / 03 / 2009, 08 : 07 PM
حنا مـع اللـي يسكـن الأرض سكـان=وبعزومنـا فــوق الثـريـا سكـنـا

أخوي عبد الله

قصيدة تجمع بين الخضوع والإستسلام لله سبحانه وتعالى

وبين الفخر والإعتزاز بالقبيلة

وهذه هي الفطره السليمه

قصيدة تحتاج إلى القراءة أكثر من مره

وفيها الكثير من الإبداع

تقبل كل التقدير والإعجاب

ابوشيبه
11 / 03 / 2009, 13 : 07 PM
صح لسانك والله لايهينك على القصيده الكفوو
تحيتي لكـ,,,

الناااايفه
12 / 03 / 2009, 29 : 12 PM
وسلومنـا ورث مـن أبــا وجــدان===نطيـب مـن طيـب أصلنـا ومعـدنـا


صح الساااااانك يا أستاذي القدير (عبد الله المشعلي)


الجزاااله عنوانك00 واافي وقصيده وافيه


شكرااااااا لك من الاعمااااق

عبدالله المشعلي
12 / 03 / 2009, 47 : 01 PM
حظ عيني , المحترم , بطيحان بن ناصر بن هرسان , ناصر بن هذال بن شري , محسن المسردي , أبو شيبه , شاعرتنا ( الناااااايفه ) وهذه المرة بين قوسين حتى لا هتجيننا وعلى فكرة أنتي لم توفي بوعدك ؟شكراً على المرور الذي استمد منه الفخر والاعتزاز

الناااايفه
12 / 03 / 2009, 07 : 06 PM
(النايفه) وليس (النافي) >< !!
الشاعر عبد الله المشعلى الى الان وانا عند وعدي ولكن لم اجد رابطاااا لمنتداكم ؟؟

عبدالله المشعلي
12 / 03 / 2009, 13 : 08 PM
الأخت النايفه هذا خطأ مطبعي وأنا داري اني ما راح اسلم لكن القوي الله
اصيح مما حصل ولانبي بناجي=............................................ .
أعتذ لك عن الخطأ المطبعي الغير مقصود

أبو فـلاح
18 / 03 / 2009, 58 : 11 AM
من طاب فعلـه طـاب والخـد ميـدان
لـو أنتمـا الأوطــان بـعّـد ودنّــا
اليوم (بدو) و(حضر) من فضـل منـان
صرنا سـواء مـن شامنـا لـى يمنـا

صح لسانك يابو مبارك ....

الشااااايب
22 / 03 / 2009, 32 : 12 AM
صح لسانك ولا هنت

عبدالله المشعلي
24 / 03 / 2009, 57 : 03 PM
الله يصح أبدانكم جميعاً ( أبو فلاح ) و( الشاااايب ) مروركم يزيدني شرفاً وفخراً