كم رميت (ن) اخطت وهي من رامي === وكم رميت (ن) صابت بلا وزنيه

[الحياه كلمه]

بسم الله الرحمن الرحيم
هذي القصيده موجهه لابن عمي واخي الكبير شايع بن فلاح بن فالح
من غير قصور بالقراء وارجو من ابو جود ان يسمحلي على القصور00

ابا انضم اشعاري واخط اقلامي=وانصاك انا ياخوك بالمطويه
كم رميت(ن)اخطت وهي من رامي=وكم رميت(ن)صابت بلاوزنيه
عسى الذي رباك ماينضامي=ولايعكر صفوته محقيه
شايع خويي لابغيت حزامي=هو الشوير اللي يفك العيه
لاضاقت الدنيا وقف قدامي=ثم صدها ماهو بطمع(ن)فيه
الله يكتب له مديد اعوامي=ولايذوق الحزن وروحي حيه
وسلامتكم00

[أبو فايز]

أخوي الغالي سعود الأبيات جميلة وفيها خروج عن المألوف الذي جعلني أزهد في كثير من القصائد في هذا المنتدى وخارجه ... الإبداع لا يمكن أن يكون عند شاعر يعيش على الأبيات المطروقة الممجوجة التي تنفر منها الذائقة الأدبية الحساسة ...

الإبداع هو أن تأتي بجديد خارج عن المألوف وعن النسق التقليدي مع المحافظة على تماسك الوزن والقافية ، وهذا والله الشئ الذي لم أره بصورتة الحقيقية في القصائد المتناثرة في هذا المنتدى وحتى ممن يشار إليهم بالبنان ، وليسمح لي الإخوان في هذه الكلمة الصريحة ، مستوى أغلب القصائد التي قرأت في المنتدى من الشعراء الشباب دون المتوسط بكثير ..

أبو حمد سبق وأن أرسلت إلي بالأبيات وسجلت إعجابي بها وخاصة البيت الثاني صح لسانك ولا فظ فوك .

[الحياه كلمه]

تعليقك على القصيده وسام على صدري اعتزبه يابو فايز
ويرفع من معنوياتي واصراري واشكرك جزيل الشكر
مع تحياتي 00
اخوك سعود

[أبو جود]

بيض الله وجهك يابو حمد وصح لسانك والقصور ماحصل قصور
استلم الرد

يامرحبا ياسعود زبن الضامي = يامسندي بالحق وقت الهيه
البحر خلفي والعدو قدامي = وانا افتخر بالمدح من راعيه
خصيتني بالطيب يالمقدامي = وايدي بدونك ماتصفق ليه
يمنى بلا يسرى تروح حطامي = وتضيع لاهاذي ولا هذيه
ابشر بعزك لو تبي صدامي = يرجع يحكم عراق مع سوريه
لجلك يهون اليوم كسر عظامي = وتهون روحي لو تجي مبريه

[ابوخالد]

صح لسانك يا سعود...
ابيات رائعه وبحر لا يطرق كثيرا من الشعراء..

ورد وافي من الاخ ابوجود..( اخو زميلي وصديقي الغالي حمد)..
ولا غرابه فهو من بيت شعر..

[محسن المسردي]

صح لسانك يا سعود

ويكفيك من هذه الأبيات البيت الثاني

رغم تحفظي على الكلمة الأخيرة في البيت الثالث

وصح لسان أبو جود على الإبداع في الرد

وتقبلوا جميعاً أجمل تحية

[الحياه كلمه]

وجهك ابيض يابو جود وصح لسانك
اخوي ابو خالد يكفيني ان شاعر مثلك يشيد بالقصيده
شاعرنا الكبير محسن مشكور على المرور ولك تحياتي00

[أبو فـلاح]

ياخي لو دارين أن الإنجليز بيحركون قريحتك كان دورنا لك عقد إحترافي من زمان ...

صح لسانك يابو حمد والله يوفقك في دراستك ..

[الحياه كلمه]

هههههههههههههههه
الله يسلمك هي متحركه من زمان بس مخفيه
يشرفني مرور البوس الكبير حقنا وشهاده
اعتز بها من اخ كبير والله يوفق الجميع
تحياتي لك ابو فلاح

[الخلاوي]

ابوحمد صح لسانك ابيات وافيه وجزله ولايستغرب منك مثل هذه الأبيات فعمك الشاعر الكبير حمد هادي
ابوجود (((لاتعليق)))
لو اكتب ماوفيت القصيده حقها
ننتظر إبداعاتكم
دمتم شعراء

[الحياه كلمه]

يشرفني مرورك وتعليقك على
القصيده ومشكوووووور ولاهنت
اخوي الخلاوي

[ناصر بن هذال]

صح لسانك
قصيده جميله والاجمل رد ابو جود
..
دمت مبدعا ونتظر جديدك.

[ابن غوينم]

الاخ سعود صح الله لسانك ويعطيك العافيه على القصيده الجزله
ويستاهل ابو جود ورد رائع منه الف شكر لكم جميع وبالتوفيق

[سلطان بن ذيب]

صح لسانك يابوحمد ولايهون ابوجود أبيات جميله حقآ

[الحياه كلمه]

الاخوان
ناصر بن هذال بن شري
ابن غوينم
الحر النادر

لاهنتو على المرور وصحت ابدانكم جميع

تحياتي لكم..

[!! تقوى الهجر !!]

صح لسانك ابو حمد وصح لسان ابو جود
وننتظر ابداعكم ودمتم بوود
تقبل مروري

[الحياه كلمه]

لاهنت على المرور تقوى الهجر
وصح بدنك
تحياتي لك..

[أبو محمد]

لاهنتو جميع 000000في البدع والرد 0000000مبدعين والله لايفرقكم

[الحياه كلمه]

من قال لايهون وبيض الله وجهك على المرور يابو محمد

اللهم امين والله يجزاك خير

تجياتي لك..